أنا باكره إسرائيل!!! وبعديــــــــــــن!!!!

أكيد كل عربي بيكره اسرائيل

أكيد كل مسيحي وكل مسلم بيكره اسرائيل

أكيد كل انسان طبيعي يكون بيكره اسرائيل اللي قايمة علي أنقاض دول تانية بتسرق منها لحد النهاردة اراضي ومياه وبتتوسع علي حساب جيرانها العرب

حلوة جيرانها دي

اسرائيل اللي بتهدم المقدسات الدينية وبتضرب المدنيين بالاسلحة المحرمة دوليا وحتي بتجرف المقابر اللي عمرها اكتر من الف سنة علشان تبني مكانها مستوطنات يهودية

حتي الموتي مش سايباهم في حالهم

طيب بنكره اسرائيل.. عملنا ايه علي ارض الواقع علشان نقف بيه ضد السياسات الاسرائيلية الوحشية في قطاع غزة والضفة الغربية وجنوب لبنان والجولان؟؟

ايه الاجراءات اللي واجهنا بيها اسرائيل؟؟ وايه اللي عملناه علشان نساند الفلسطينيين والسوريين واللبنانيين؟؟

من المعروف ان الحروب بتقوم بالاسلحة وبالجنود وبالمعلومات وبالاقتصاد كمان

لو مش قادرين نجاري اسرائيل في امتلاك الاسلحة الحديثة او اننا ندخل في حروب مع الكيان الصهيوني يبقي اكيد قادرين نهدم الاقتصاد الاسرائيلي او علي الاقل نضعفه من خلال عمل حصار اقتصادي حقيقي علي اسرائيل من كل الدول العربية والاسلامية من اندونيسيا شرقا الي موريتانيا غربا ومن كازاخستان وتركمنستان شمالا الي ادغال افريقيا جنوبا

-----------

اي دولة في العالم محتاجة تواصل اقتصادي واجتماعي وسياسي مع المحيط الاقليمي للدول المحيطة بيها او اللي بيسموه دول الجوار

اي دولة لو انعزلت عن جيرانها بشكل كامل ممكن تنهار اقتصاديا لان الحصول علي موارد للطاقة ومستلزمات الانتاج من الجيران ارخص واسهل بكتير من الحصول عليها من اخر الدنيا

برضو وجود أسواق تصديرية في المحيط الاقليمي لاي دولة مهم جدا جدا

يعني لو في حصار اقتصادي حقيقي علي اسرائيل من الدول المحيطة بيها( الدول العربية وتركيا وايران) ممكن تؤدي لمشاكل اقتصادية واجتماعية بالجملة للمجتمع الاسرائيلي وبالتالي زيادة معدل الهجرة من اسرائيل وانخفاض معدل الهجرة اليها وبالتالي هايبقي مفيش داعي انهم يبنوا مستوطنات من الاساس لان مفيش حد هايعيش فيها خصوصا لو عرفنا ان معدل المواليد في اسرائيل منخفض جدا وان معدل الخصوبة للمرأة الاسرائيلية هو الاقل عالميا

ليه بنتعامل مع اسرائيل تجاريا في الوقت اللي بندين الاعمال الوحشية لقادتها وجنودها؟؟؟

ليه بنسمح للاسرائيليين بالدخول لاراضينا والتمديد علي شواطئنا وايديهم غارقانة بدم اطفالنا؟؟

بالنسبة لمصر والاردن في اتفاقيات سلام بتفرض علي الدولتين مستوي معين من التطبيع الدبلوماسي والاقتصادي مع اسرائيل ما تقدرش مصر او الاردن التملص من الجزئية دي والا هايبقي هدم الاتفاقيات دي من الاساس والدخول في حروب جديدة

لكن اتفاقيات السلام دي ما بتلزمش الاردن انها تدخل في اتفاقيات اضافية زي الكويز مع اسرائيل تشترط نسبة مكون اسرائيلي معينة لدخول المنتجات الاردنية للسوق الامريكي الضخم بدون جمارك

نفس الكلام بالنسبة لمصر واتفاقية الكويز اللي شغلت مصانع كتيرة في اسرائيل في الوقت اللي بنطالب بمقاطعة المنتجات الاسرائيلية والشركات الدولية اللي بتدعم اسرائيل بجزء من ارباحها

ليه بنصدر غاز طبيعي لاسرائيل ونمدها بأساسيات الحياة ونشغل مصانعها وننور المستوطنات الاسرائيلية اللي اتبنت علي انقاض بيوت فلسطينيين وسوريين؟؟

ده بالنسبة لمصر والاردن طب باقي العرب اللي مفيش اتفاقيات تطبيع بتلزمهم بالتبادل التجاري مع اسرائيل ليه بيصدروا ليها بترول وفاكهة وخضار عادي زي ما يكون اللي بنشوفه في النشرة كل يوم ده فيلم أكشن مش اكتر علي ام بي سي اكشن؟

وليه بنستورد من اسرائيل كل حاجة عادي جدا؟؟

ازاي مش قادرين نربط ما بين التبادل التجاري وبين المجازر اليومية اللي اتعودنا نشوفها في كل نشرة؟

ليه مش قادرين نستغل القوة الشرائية الضخمة للدول العربية والاسلامية بشكل عام ودول الخليج بشكل خاص بالتأثير في السياسات الامريكية في المنطقة وفي مجلس الامن؟؟

ليه بننفعل مع الاحداث واحيانا بنبكي علي مشاهد القتل وهدم البيوت وبعدها بدقايق نطلب دليفري من كنتاكي وماكدونالدز عادي جدا؟؟

عالم اليوم بتوجهه المعلومات والاعلام والاقتصاد اكتر من القوة العسكرية


المصدر: ahmed alrefai كتابات مصراوي