فى أحدى جولاتى بين الصحف والمجلات الإلكترونية وجدت هذه المقالة التى ذكرتنى على الفور بجوابات حراجى القط بتاعة عمنا الأبنودى ولكنت مع أختلاف الأسلوب نقلتها لنتشارك متعة قراءتها ونتحسر على أحوالنا ولنعلم أننا ليس لدينا غير السخرية والتهكم على أوضاعنا حتى نفرغ ما بداخلنا الله المستعان
سرى للغاية
خطاب إلي الغالية سعدية بكفر حسان طريق الرجدية وإن ما كانتش في الكفر تبقي عند أمها بكفر التعبانية وإن ماكنش عند أمها يبقي نهارها اسود وجايز تطَّلق فيها وبعد. أعرفك يا سعدية يا حبة نغاشيش قلبي إني أعيش في سعادة وزيادة من ساعة ما نقلوني ساعي في مجلس الوزرا بمصر المحروسة. ومهما شرحت لك لن تفهمي لأنك بهيمة زي أمك العزيزة عليّ، لكن المشكلة إني عايز أفضفض، ومش لاقي حَد أفضفض له إلا انتِ اللي وحشاني خالص ونفسي أتلم عليكِ علشان حاجات كتير نفسي نعملها لكن عيب نتكلم فيها
أعرفك يا سعدية إني أنام الآن في التكييف، وعهد الله زي ما باقول لك يا رب عمك عبد الرحيم الغالي على قلبي يدوسه قطر ويقطعه حتت، ومش كدة وبس، بانام في التكييف اللي بينام فيه الوزير، أنا متأكد إنك مش مصدقاني، وأنا عارف إنتِ مش مصدقاني ليه؟.. من يوم ما شُفتيني بالليل على السطوح مع البنت سماح المايصة، بقيتي بتكذبيني على طول ورغم إني حلفت لك إني كنت بانصحها إن المشي البطَّال وحش وآخرته مش كويسة، لكن أعمل إيه في مخك الزنخ!
طب تصدقي بإيه إن رئيس الوزارة الطويل خالص بيعدّي جنبي وأنا واقف عادي جدًّا، وهاقول لك حاجة يا سعدية إوعي تقوليها لحد، حاسب انا عارفك طالعة لخالتك سنية الخّباصة ما يتبلش في بقك فولة، تصدقي يا سعدية إن رئيس الوزارة يبقي فرحان قوي وهو معطل المرور على الفاضي في الرايحة والجاية، وحياتك سمعته بوداني بيسأل الظابط "إحنا عطلنا الناس كام ساعة النهاردة؟ فالظابط قال له ساعتين يا باشا راح زاغر له وقال له علشان انت بتجري!!
ولعلمك يا سعدية دول وزرا علينا احنا بس، ينفشوا ريشهم في الرايحة والجاية لكن عايزة تضحكي لما تنفطسي أول ما يقولوا لواحد فيهم الريس عايزك، يا داهية دُقي، يبقى الواحد فيهم عامل زي اللي ابوه مات في بيتهم اللي اتحرق وجوَّاه كل البهايم اللي حيلتهم، بيبقى هيعملها على روحه وعينه زايغة علشان اليغمة خلصت وهيرجع زي زمان شخص عادي زي اللي ماليين الشوارع ومالوش أي لازمة والثلاثة منهم بأربع قروش.
وفي الآخر يا سعدية أحب اعرفك إن مفيش فايدة في أي حاجة في بلدنا طول ما فيها وزرا ورئيس وزرا زي اللي انا باخدمهم علشان انا سمعت واحد بيقول للتاني الهبرة المرّة دي كبيرة قوي فالتاني قال له ماتخافش مش بيحاكموا الوزرا، وإيه أكثر من طفل الوزير اللي عجبه قصر اشتراه يلعب فيه بالعجلة لكن أرجع واقول لك الحق مش عليهم.
النهاردة يا سعدية الوزارة اتقلبت علشان لاقوا ورقة مكتوب عليها "المية الوسخة ماتنضقش" وكل واحد يا بت يا سعدية خد الكلام علية وقاعدين يسألوا الناس، عايزين يعرفوا من الكتب الكلام دة، وأنا طبعًا مااعرفش مين اللي كتب الكلام دة، الكدب خيبة يا سعدية، لكن طبعًا عارف مين "المية الوسخة" زي كل الناس واضحكي يا بت.
محمد أبو الوفا
جولة صحافية 
رد مع اقتباس
مواقع النشر (المفضلة)