خلاص مش هكتب تاني
بعدين يقولوا أناني
كل يوم بيحب جديد
وعايش على الأرض من بعيد
جاى من كوكب تاني
يحقق هنا الأماني
ويكتب شعر وزجل
لا خوف بيهده ولا وجل
هايم وعايش أوانه
ولا كأنه روميو زمانه
كل يوم حب جديد
يكتب ويقول وهو سعيد
فرحان بخروج كتاباته
بحروفه السخنة وعباراته
اللى تمس العاشقين
وتدوبهم مع الدايبيين
على فكرة ده بس كلام
بيحقق بعض الأحلام
وينسينا هموم دنيتنا
اللى أمنا لها خدعتنا
يبقى أكتب تانى ولا خلاص
لا يقولوا عديم إخلاص
وقلبى مهبط للطيران
يستقبل أي قلب حيران
يتغزل فيه ويكتب له
وكل الحروف ينظم له
شعر وزجل ونثر كمان
وخواطر كلها حرمان
ولا حكايات الغرام
اللى ملتها الآلام
خلاص خلاص هبطل شعر
لما يخلص منى العمر
خلاص مش هكتب تاني
بعدين يقولوا أنانى
مواقع النشر (المفضلة)