زجل بوجل

[كريم يحيى]

أحنا مين


قلت لى بقى أحنا مين
أحنا الغلابة الشقيانين
اللى شقينا فى أرضنا
نحلم بحصاد زرعنا
ونلم ولادنا ونجرى
فى الأرض ولا المجرى
نحلم باول طرحة
ونصحى على موت الفرحة
صحيح بتسأل أحنا مين
أحنا الولاد المصريين
اللى لسه بنقاوم مصايرنا
ونقول هيجى يوم يجبرنا
ربنا كبير يا عم سلامة
وخليها فى سرك تبقى علامة
لما يبدلوا للشباب البانجو
ويعلموهم شرب المانجو
والعيال اللى بتشم الكله
يبقوا ولا ولاد الست فله
أقولك أنا هربت لكن راجع
أعيش مع ولادى المواجع
رغم وأنا مش دارى
المهم اخدت قرارى
أكون هناك فى فى ميدانها
بدل مانا بخدم فى جيرانها
لو كلنا قمنا الشيخ ويا القسيس
هنعيش عيشة ولا أوناسيس
بلدنا كلها خير وأمان
بس نهش الغربان
اللى معششة فوق رؤسنا
ودايما كابسة على نفوسنا
أحنا بقى مين أحنا ولادها
مصراللى عايشة بأمجادها
وهتفضل دايما البيت الكبير
لكل جيرانها ولكل عليل
يارب ماتحرمنى منها ولا من خيرها
أندفن فى الإمام وجرجس فى قلب ديرها

[كريم يحيى]

أشتقت لك يا مصر


لبلادي قلبي طاير
وبقول أمتي البشاير
اشتقت لك يا مصر
يا ست كل عصر
يا شابة رغم القدم
يا غنوه في قلب الألم
دبت فيكى وفى ترابك
يا مدوية قلب أحبابك
غزوكى كنير الغزاة
وولادك دايما حماة
ولادك الطيبين
المليانين حنين
حنين لتراب يا مصر
ياساكنة أعلى قصر
لمه الشمل بطيبتك
وقلوبنا عامرة فى غيبتك
نتشوق لنسيم عبيرك
وشربة من مية نيلك
لكن خلاص راجع
أبكى وأحكى المواجع
النهار ده يوم السعد
يوم لقائك ده هو الوعد
النهار ده جاى أشوفك
وأوعى تدارى كسوفك
وفرحتك بيا لما أجيلك
مانا أبنك وشارب من نيلك
أنا اللي نمت في حجرك
وياما شيلتينى على كتفتك
راجعلك يا غالية اليوم العصر
راجعلك يا مصـــــــــــــــر

[كريم يحيى]

مرايتى


الله على مرايتى
لما تحكى حكايتى
وتقول اللى شيفاه
من غير زواق وياه
هى دايما صريحة
وصراحتها ده فضيحة
قالت لى أنت كبرت
وأبيض الشعر وصرت
كرمشة وشك مرسومة
كأنها قضية محسومة
لابد منها ولا هروب
من القدر المكتوب
أجيال بتسلم أجيال
والشاطر هو اللى قال
وعمل فى دنيته لربه
ولدينه والرسول وحبه
يارب أهدى لى مرايتى
وتخبى عنى نهايتى

[كريم يحيى]

أنا وسيد درويش

درويش لما قال زمان
أحسن جيوش فى الأمم جيوشنا
وفى الشدايدتعالى شوفنا
ساعة مانلمح جيوش الأعادى
نهجم ولا شئ يقدر يحوشنا
رديتوقلت أنا كمان

يا خسارة على الولاد
لما نسيوا أن لنا أمجاد
وطأطوا العين والراس
وسابوا اليهود حراس
على الأقصى وعلى القدس
رجعت أيام الفرس
من قانا لغزة بنبكى
زى الولايا ونحكى
عملوا فينا وطاحوا
وأدى الرجالة راحوا
مبقاش غير الحريم
لابسين بادى على دريم
والوسط ساقط لتحت
وعقل الشباب شت
الوحى هبط بزجل
جريت وكتبت بعجل
كتبت أشكى لكم همى
من خوفى على أختى وأمى
وبنتى اللى لسه صغيرة
لتشوف الدنيا متغيرة
متغيرة عن الطبيعة
والفطرة والشريعة
يارب أهدينا وخد بأيادينا
ولبر الأمان وجهنا وعدينا

[رمضان الشيخ]

ايه يا عم كريم كل ده شايله لوحدك فى قلبك انا كمان زيك متضايق من وضع البلدوالحمد لله اننا نقدر نعبر ونخلص من همومنا بالكتابه طالما نحن مهمومون بحال هذه البلد ان شاء الله ربنا ح يولى من يصلح ويصبح لتعبنا وانشغالنا باصلاحها فائده علينا وعلى الاجيال القادمه

[كريم يحيى]

عمنا أستاذ رمضان

تعرف مش نافع فيها كلام

لكن برضه بنحبها ربنا يهديها علينا

أسعدنى مرورك جدا وشرفنى