ياأمي وأولادك في العد بالملايين
دول الشقايق ولسه تاني من الحنان شاربين
طيب ياأمي شوفي أحوالنا
النيل بقت ميته من دمنا وأنت أول الشاربين
والأرض حواليك ترابها همنا وأنت أول الدايسين
ياأمي فين حقنا دا احنا ولاد العين
وبعد دا تستغربي لما ابن عمي يهين
إذا كنت أنا منك وأنت اللي بعداني
وأزرع أنا أرضك وأنت اللي قلعاني
وأبني في عماير للسحاب وأنتي اللي هداني
ياأمي لو تديلي الحق جواك
وترجعيلي اللي راح أكون أنا فداك
وتعرفيهم إني منك مش يتيم الأم
كل اللي رايح واللي جاي جايب معاه الظلم
وأنت سايباني في غربتي جواك وبعاني
ودمعتي أنت أولى تمسحيها وأنت ضماني
أبكي وأشكي لمين وأنت اللي ولداني
لكن ياأمي اعذريني في الكلام الجاي
لو ما ينصلح حالك وحالي لسه فيه عندي
عزم وإرادة وقوه تعدل المايل وماتهدي
ولسه فيه صوت جوايا لو يعلى لو تعرفيه الصوت
عمره مايسكت تاني ولايحبسه الجبروت
غير لما يخلص حق أولادك اللي طواه الموت
ولا اللي مالي جيوب كل اللي نهبوك
ولا اللي ضايع تحت رجلين اللي غموك
ولايرجع اليوم اللي غيري فيه يعريني
واللي ماولدتني عمرها ماتقوم تغطيني
وأصرخ وأقول ياأمي وأنت بعتيني
ياأمي لازم تعملي حسابك لو يوم طلبتيني
لو تطلبيه الدم أفتح شراييني
لو تطلبيها الروح هاديك سكيني
وانتي كرامتك فوق ودا أمر من ديني
لكن في قلبي طلب أديك وتحميني
