ياه على الست يا جدعان
غنت وهيجت فيا الجنان
قالت قد إيه من عمري راح
مع أننا فى الحب نسينا الأفراح
وأتعذبنا مع الحبايب
اللي سقونا المر دايب
أبتدت تخاف لا العمر يجري
مع أنه راح ومعاه فكري
يمكن فى الزمن المشكلة
ولا فينا أحنا المعضلة
زمان سمعنا حكايات
عن قيس وليلي واللي فات
عن عشاق ضحوا بحياتهم
لجل المحبوب ما يفوتهم
لكن ده كله كان
أيام ما كان فيه إنسان
بيعرف يحب ويتحب
ويسقى اللي حواليه من الحب
ويدي بلا حدود
مش بس ملك ويسود
كان فيه حب بلا كبرياء
كان فيه إخلاص ووفاء
الله يرحمك يا عم رامي
كتبت كأنه كلامي
جددت حبك ليه
ما كنت قلبي نسيه
الله يرحم زمان
ويعوضنا عن الحرمان
بقلب جديد صغير
يكبر فى حبي ما يتغير
يتربى فى عز الحب
ولا يتكبرش على القلب
اللي أشتراه بالغالي
وغني له فى موالي
على تقاسيم الربابة
بصوت الراوي للغلابة
اللي جرحهم الحب
ونفسهم يداووا القلب
أقول لكم أسمعوا أم كلثوم
وأنسوا معاها الهموم
الله يرحم زمان
وأيام الهنا والأمان
