ليه بتقولي الوداع ولسه بينا كلام كتير
بينا حكايات وآهات وبينا عتاب و ملام
بينا علي البعد رغم عنا ذكري عايشة وسلام
بينا حكاوي في ليالي باردة ماخلصنهاش
كنا بندفيها بكلامنا ودفئ الكلام مانتهاش
ليه بتقولي الوداع
ولسة ايدك حاضنة ايدي ونظرة الامل
بتترجي في عنيكي بلاش تصدق
بلاش تقبل الوداع وترحل
اللي بينا لسه باقي -- باقي عمر
بينا علي مدار السنين احلام ماتخلص
ليه بتقولي الوداع
ونابضك حاسه بيرتجف
وقلبك شايفه بيرتعد
وغمزتك غصب عنك واصطناعك لضحكتك
بتقولي الوداع وانتي علي نفسك بتكذبي
وان صدقتك انا
مش ممكن الانا حتصدقك
ليه بتقولي الوداع
وموج البحر بيضمنا وقمر سهران بيبكي
هو نفس القمر اللي شهد اول ليالي حبنا
ليه بتقولي الوداع
وفي طفل صغير علي ذراع امه بيضحك لنا
وفي عيون فرحانة سهرانة مصهللة
وفي عيون حساد بتتربص لنا
ليه بتقولي الوداع
ياقلبي وروحي وعقلي
ياايامي وسنيني --- يا ضحكتي وجرحي
ليه بتقولي الوداع
وفين عهدنا علي الباقي من عمرنا
علي الوفاء وقبر واحد بعد الموت يضمنا
ليه بتقولي الوداع
وانتي حاسة بيا وحاسس بيكي
لسه دمي بيجري في وريدك
ودمك بيجري في وريدي
لسه بنقسم الضحكة بينا
حتي الاحزان سوا بنكتمها
علشان لا آلمك ولا تآلميني
ليه بتقولي الوداع
وانتي حتة مني
ليه عاوزة الجمال يبقي ذكري
ليه عاوزة كل شئ يموت النهاردة
ولا يبقي شئ لبكرة
ليه بتقولي الوداع
وانا حاضنك تحت جفوني وقافل
عليكي عيوني
وانا لسه باحميكي -- لسه باضحي بنفسي
وافديكي -- والا نسيتي
ليه بتقولي الوداع
طيب مادمتي مصرة
اسمحي لي لآخر مرة اضمك
واملي نفسي من عنيكي
اسمحي لي ابكي بين ايديكي
