حد فيكم يقدر يقول لى أمتى نخلص من الأشكال والصور ده
القاهرة
القاهرة عيارها فلت وباظت
وتقول لها عيب تقول قول يا باسط
ماشية بتتآصع بجيبه قد الكف
ونسيتها جمالها في الملاية اللف
بتقلد خالتو أمريكا
وهى في الأصل الفابريكا
خلفت عرابي والنديم
والست ثومه وعبد الحليم
وعمو نجيب وزويل
وكارم اللي متعنا بـ يا ليل
القاهرة اللي كانت منارة
دلوقتى كلوب في قلب حارة
لا نوره أنتشر وغمرنا
ولا نور قلب دارنا
يا عيني عليكى يا قاهرة
يا بنت المعز يا ساحرة
كنتى زمان وكنا معاكى
نعلى ونطير في قلب سماكي
دلوقتى بقينا صغيرين
وكبارنا هما الدفيانين
بعزك انتى أتمتعوا
وعلى زلنا أتمطعوا
وكأننا جايين لهم
سخرة ننضف تحتهم
الفرق مش كبير
بينهم وبين الحمير
لكن حمير فايف ستار
تمص دمنا بالقنطار
وإحنا يا حسرة علينا
بس نكتب ونمد أيدينا
لأمتي يا حلوة الهوان
يا ست العصر والزمان
نفسي أشوفك يا بلدي
بجلابيتك أم سفرة البلدي
زى زمان وقورة
بمنديل بآوية وأموره
وترحه سودا مقصبة
ماشية بيها متعصبة
