حبيبتى الغاليه إتشعلقت فكتفى الصبحيه
بكت وبكيتنى يابنتى بلاش الرحله ديه
لأ يامه سبينى خلاص بركانى ثار
لأ يامه خلاص خرج من جوايا النار
قلتلها انا خارجه على أقدام رجليا
لو رجعتلك متشاله على إيد الناس الجايا
يامه متبكيش بس لفينى فعلم بلدى
واحكى قالت رايحه أجيب حق ولدى
هروح يامه على ميدان التحرير
يمكن يامه يمكن ننول التحرير
ووصلنا لمكان لقانا ألى أتفقنا عليه
وكان مشهد واقع ودافع للى نوينا عليه
طول طريقنا ندعى ونقول هنقدر نخليه يرحل
ووصلنا لكن خرج علينا الجيش ارجع أرحل
لا أرحل لا أنا ميدان التحرير هو مكانى
لا انا ناوى أموت أو أرجع بالحق لعيالى
وحلفنالهم ان النصر لينا الليله
ومش هيفضل حسنى ولا ليله
وفجأه طلعوا علينا ببيان
ان خلاص الظلم راح وكان زمان
حسنى وفساده وعز معاه فخبر كان
هدوا النار جوانا وخمدوا البركان
راح الظالم حسنى واعوانه والفساد
واختفى من حياتنا وما راح ينعاد
مشاعر غريبه سيطرت علينا
حزن وفرح ودموع فعنينا
افرحى يامه رجعالك من مصر
شايله فإيديا توب النصر
افرحى يامه وقولى لولادى
من انهارده هنغنى
بلادى بلادى
لكى حبى وفؤادى
أخوانى فخير بلدنا
كلماتى اهداء لكل مصرى
كلمات كتبتها وسط جموع لا أعرف اغلبها أصبحنا شخص واحد لحظه التمنى بالنصر
اكتبها أخوانى أثناء عودتى من ميدان التحرير
فى طريق العوده بالنصر
