كنت اتمنى يكون لي ابن صغير

كنت اتمنى يكون لي ابن صغير
آخده بين أحضاني
بس ما شاءشي الله القادر
أن يعطيني
كنت حاديله من حبي وعطفي وحناني
وفي وحدتي يلعب جنبي ويسليني
وأشوفه وهو بيكبر
بسم الله الله اكبر
لكن ما حكم بيه الله يرضيني
قلت اتبنى طفل
من أم وأب فلسطيني
مات ابوه وماتت امه
ويشاركني في وحدتي
واما يكبر يحميني
ويكون ابني واحطه في قلبي
ويكون سندي في الدنيا وعوني
ولما ينتهي عمري يشيلني
ولتراب بلدي يوديني
وعند قبري يوماتي يزورني
ويدعيلي واشوفه بعيني
واتبنيت طفل وحيد ومالوش حد
في وسط الحجاره لقيته بيبكي ودموعه على الخد
شيلته وبين ايديىّ حضنته
ابن مين انت؟ سألته
ما سمعتش منه رد
أصل لسه ما تكلمشي
ولا يعرف اب ولا ام ولا جد
فرحت لان ربنا عوضني
وبقالي ابن بجد
قلت يا رب ده ابني
خد عليىّ عهد
يا ربي دا وحيد في الدنيا ومالوش حد
يا رب الام موش بس اللي بتولد
الام هي اللي بتربي
يا ربي عوضتني وبيه حاسعد
حاشيله جوه في قلبي
كان كل يوم بشوفه بيكبر
وانا سعيده وبيلعب جنبي
اتمنيت طفل صغير
ربنا حقق املي
ححقق ليه كل ما حاقدر
لحد ما يكبر ويحرر بلدي
وياخد بتار امه وابوه
والغالي حبيبي زوجي
كبر ابني وبقى في عز شبابه
وانضم لكتايب التحرير
اتفق مع كل صحابه
لتحرير بلده وكل أسير
كان يتباهى بحمل سلاحه
وبفخر ولا احسنها أمير
كان المصحف هو كتابه
لله العزه سبحانه القدير
كنت أتألم واسهر لغيابه
ويتقطع قلبي لما اسمع تفجير
لما يرجع كنت احس بأنفاسه
ولحبه لبلده كنت بغير
في ليله قالولي طلق أصابه
فضّل يموت ولا يكونشي أسير
وفي علمه لفوه أصحابه
كتبوا على قبره شهيد التحرير
عوضني يا ربي تاني بداله
عوضني يا ربي عنه كتير
ابني ما ماتشي ابني حي
ابني شهيد
ابني جاى
وجايبلي معاه أضحية العيد
ابني متهني ابني في قبره سعيد
ابني في الجنه
لله الامر ولله ما يريد
****
الشاعر المصري
شوقى غنيم
عضو رابطة الكتاب العرب