-
أحمد فؤاد نجم
من صري و انا اعشق هذا الشاعر و كان السبب قصيدة القاها علينا استاذ اللغة العربية
و كانت اول مرة اسمع فيها قصيدة باللهجة المصرية
طلبت من معلمي ان يطعيني اياها و حفظتها في اليوم نفسه و ما زلت للان استمتع بترديدها
و لابد ان نحيي الشيخ امام الذي حمل صوته قصائد احمد فؤاد نجم
و هذه القصيدة التي عشقتها برغم انها تبدا بالكلام عن مطربة احبها كثيرا
كلب الست
ف الزمالك من سنين
و ف حمى النيل القديم
قصر من عصر اليمن
ملك واحدة من الحريم
صيتها أكتر م الأدان
يسمعوه المسلمين
و التتر
و التركمان
و الهنود
و المنبودين
ست فاقت ع الرجال
ف المقام و الاحترام
صيت و شهرة
و تل مال
يعني في غاية التمام
قصره يعني هي كلمة
ليها كلمة ف الحكومة
بس ربك لجل حكمة
قام حرمها م الأمومة
و الأمومة طبع ثابت
جوه حوا من زمان
تعمل ايه الست
جابت فوكس رومي و له وان
فوكس دا عقبال إملتك
عنده دستية خدامين
يعني مش موجود ف عيلتك
شخص زيه يا اسماعين
و اسماعين دا يبقى واحد
م الجماعة الغلبانين
اللي داخو ف المعاهد
و المدارس من سنين
حب يعمل واد فكاكه
و يمشي حبه ف الزمالك
و القيامة و الفتاكة
يرموا طبعا ع المهالك
غم سمعه من قيامته
حب يعمل فيها فله
بعد ما ألوط بيجامته
اشترى حتة مجله
قول مش بيقراف حكاية
من حكايات الغرام
و اندماجه ف القرايه
خلا مشيه مش تمام
ع اليمين يحدف بعيد
خطوتين
و تروح شمال
لمحه فوكس من الحديد
قال دا صيد
سهل و حلال
هب نط ف كرشه دوغري
جاب بيجامته لحد ديلها
اسماعين بدال ما يجري
قال يا رجلي
رجلي مالها
بص شاف الدم سايح
من عاليها و من واطيها
و ياللي جاري
و ياللي رايح
المجلة مش لاقيها
حبه و تلمو الظنايا
اللي هما البوابين
و الهكايه و الروايه
قال لهم دا كلب مين ؟
كلب مين
ما كلب مينشي
سمعه لبخ حبتين
قال له واحد فيهم امشي
اللي جابك انده مين
قال دا شارع يا مواشي
للجميع
راكب و ماشي
كلمة من دا
و كلمة من دا
ظاطو و انقلبت فضيحة
قول نهايته و القصد من دا
اسماعين شرب الطريحة
راحو اسم الشرطة جمعا
و النيابة كفيلة بيهم
و اترموا ف الحجر طبعا
لما ييجي الدور عليهم
شاف بلاوي ما تنحكيش
م الهفايا المحبوسين
قال يا عالم
يا شاويش
يا نيابة .. يا مسؤلين
خلصوه بعد المناهدة
جثه
من جحر الديابه
هي يمكن ساعة واحدة
كان ف مكتب النيابة
قال له ـ مالك يا اسماعين
قال له ـ زي البمب مالي
قال له ـ عضك فوكس فين
قال له ـ سيبني أروح لحالي
انت شوف سي فوكس يمكن
خد تسمم غصب عني
الوكيل قال برضه ممكن
و الشاويش قعد يغني
هييص يا كلب الست هيص
لك مجامك ف البوليس
بكرة تتولف وزارة
للكلاب
ياخدوك رئيس
انت توى ف النيابة
تسعمية من الغلابة
طب يا ريت يا فوكس كنا
و لا تربطنا الجرابة
انت فين و الكلب فين
انت كده يا اسماعين
طب دا كلب الست يا ابني
و انت تطلع ابن مين
بشرى لصاحب الديول
ولــللي له أربع رجول
بشرى لسيادنا البهايم
من جمايس أوعجول
اللي صاحبه يا جماعة
له أغاني ف الاذاعة
راح يدوس فوق الغلابة
و النيابة
بالتباعة
هيص يا كلب الست هيص
هيص يا كلب الست هيص
-
الله عليك يا رجل يا طيب البداية قوية
فى شغل عمنا نجم أكمل لنستمتع به
-
ولد أحمد فؤاد نجم في أيار- مايو سنة 1929.
و في الطريق إلى “ عزبة نجم“ قريته التي استمدت اسمها من العائلة الكبيرة “ القبيلة كما يدعوها نجم“ التي ينتمي إليها الشاعر لا بد أن ترى كل نماذج البؤس , و القهر التي تمتد عبر آلاف السنين , و تبدو لشدة وطأتها بلا نهاية .
" كان والدي في بدا حياته ضابط شرطة مشاغب أبعد عن عمله و اشتغل موظفا في وزارة المالية ثم فلاحا في الأرض التي يملكها. مات أبي و كنت في السادسة , لا أذكر من طفولتي البعيدة إلا صور الجنة.كنت طفلا مدللا أحبني والدي لأنني أشد الأبناء قبحا .و أذكر أيضا أنه قبل أن يموت قال لي ... يا بني فيك شيء يقول لي إنك إما أن تصل إلى قمة ما و إما أن تبقى في الحضيض... فليحمك الله..." .
يقول نجم : " تركنا أبي لعالم وحش بلا قانون .كانت أمي صغيرة و ساحرة .ووقعت فريسة لمطامع أعمامي و هم أغنياء ..(امتلكت أسرتنا في أواخر القرن 19 و بداية القرن العشرين آلاف الأفدنة ). رفضت أمي أن تتزوج أحدهم لأنها أحبتنا و كانت تعرفهم جيدا.و كان عليها أن تتلقى العقاب كاملا فجعنا".
عمل نجم في معسكرات الجيش الانجليزي متنقلا بين مهن كثيرة كواء..لاعب كرة.. بائع ..عامل انشاآت وبناء.. ترزي. و في فايد و هي احدى مدن القنال التي كان يحتلها الانجليز التقى بعمال المطابع الشيوعيين..و كان في ذلك الحين قد علم نفسه القراءة و الكتابة و بدأت معاناته الطويلة تكتسب معنى. و اشترك مع الآلاف في المظاهرات التي اجتاحت مصر سنة 1946 و تشكلت اثناءها اللجنة الوطنية العليا للطلبة و العمال.
يقول نجم: كانت أهم قراءاتي في ذلك التاريخ هي رواية الأم لمكسيم غوركي, و هي مرتبطة في ذهني ببداية و عيي الحقيقي و العلمي ب حقائق هذا العالم, و الأسباب الموضوعية لقسوته و مرارته.
″ ولم أكن قد كتبت شعرا حقيقيا حتى ذلك الحين و انما كانت أغان عاطفية تدور في اطار الهجر و البعد و مشكلات الحب الاذاعية التي لم تنته حتى الآن... و كنت في ذلك الحين أحب ابنة عمتي و أتمناها, لكن الوضع الطبقي حال دون اتمام الزواج لأنهم أغنياء″ .
و خرج الشاعر مع 90000 ألف عامل مصر من المعسكرات الإنجليزية بعد أن قاطعوا العمل فيها على اثر إلغاء المعاهدة, و كان يعمل بائعا حينئذ فعرض عليه قائد المعسكر أن يبقى و إلا فلن يحصل على بضائعه,» و لكنني تركتها و ذهبت«.
و في الفترة ما بين 51 الى56 اشتغل شاعرنا عاملا في السكك الحديدية. و بعد معركة السويس قررت الحكومة المصرية أن تستولي على القاعدة البريطانية الموجودة في منطقة القنال و على كل ممتلكات الجيش هناك. و كانت ورش و أبورات الزقازيق تقوم في ذلك الحين بالدور الأساسي لان وابورات الاسماعيلية و السويس و بور سعيد ضربت جميعا في العدوان . ″ و بدأنا عملية نقل المعدات. و شهدت في هذة الفترة أكبر عملية نهب و خطف شهدتها أو سمعت عنها في حياتي كلها.أخذ كبار الضباط و المديرون ينقلون المعدات و قطع الغيار الى بيوتهم ... و فقدت أعصابي و سجلت احتجاجي أكثر من مرة... و في النهاية نقلت الى وزارة الشؤون الاجتماعية بعد أن تعلمت درسا كبيرا.أن القضية الوطنية لا تنفصل عن القضية الاجتماعية, كنت مقهورا و أرى القهر من حولي أشكالا و نماذج...كان هؤلاء الكبار منهمكين في نهب الورش, بينما يموت الفقراء كل يوم , دفاعا عن مصر...″ .
و في وزارة الشؤون الاجتماعية عملت طوافا أوزع البريد على العزب و الكفور و القرى و كنت أعيد في هذه المرحلة اكتشاف الواقع بعد أن تعمقت رؤيتي و تجربتي. شعرت حينئذ رغم أنني فلاح و عملت بالفأس لمدة 8 سنوات أن حجم القهر الواقع على الفلاحين هائل و غير محتمل . كنت أجد في الواقع المصري مرادفات حرفية لما تعلمته نظريا. كان التناقض الطبقي بشعا.
في سنة 1959 التي شهدت الصدام الضاري بين السلطة و اليسار في مصر على اثر أحداث العراق انتقل الشاعر من البريد إلى النقل الميكانيكي في العباسية أحد الأحياء القديمة في القاهرة.
يقول نجم: و في يوم لا يغيب عن ذاكرتي أخذوني مع أربعة آخرين من العمال المتهمين بالتحريض و المشاغبة إلى قسم البوليس و هناك ضربنا بقسوة حتى مات أحد العمال ״ .
...و ما زالت آثار الضرب واضحة على جسد نجم حتى الآن...
″ و بعد أن أعادونا إلى المصنع طلبوا إلينا أن نوقع إقرارا يقول أن العامل الذي مات كان مشاغبا و أنه قتل في مشاجرة مع أحد زملائه..و رفضت أن أوقع ,فضربت.″
و بعد ذلك عاش نجم فترة شديدة التعقيد من حياته إذ وجهت إليه تهمة الاختلاس, و وضع في السجن لمدة 33 شهرا.
-
ابوك السقا مات
الأغنيه
شيلني واشيلك
دانا برضه فرحت لك
وانا بتاعك يا بيه
واعرف
مااعرفش ليه
وكام عبد المعين
لابد في المسؤلين
وانا بتاع كل حاجه
ودراعك اليمين
وهتيف الوزير
وسواق المدير
ومهماز المدام
ونبوت الغفير
وراش العياده
وخدام السياده
واللي من غير سناده
يتعكز ع السرير ؟
وناس بدم ساقع
واقفين
ورا البراقع
يميعوا المبادىء
ويفسروا الشرائع
وناس من خلف شيش
خايفين من الشاويش
سلبيه الميه ميه
تعالي
لأ ما اجيش
دا كان كلام زمان
ما يبقالوش مكان
في مجتمع نضال
بيعجن الرجال
بالصهد والعرق
ولو حس الألم
يوشوش القلم
يصرخ ع الورق
يقول كل الكلام
عريان
مايزقوش
ويوصف الالام
للي ما اتالموش
أصل احنا شعب طيب
والطيبه فينا
بلوى
تاخدنا من قريب
وتجيبنا
كلمة حلوة
سامعين يا اهل البلد
ولا امسك النفير
يالبنت يا الولد
يا المجدع الكبير
عارفين ماشيين منين؟
والسكه السالكه فين؟
....
مشوارنا
مش هوين
وماهواش بالقليل مهما الخيال يزين
لسه الطريق
طويل
و ع الطريق شكوك
وجبال حسك
وشوك
صحصح ياعين ابوك
وامسك
في ايج اخوك
عايزين همة رجال
ابعد من المحال
واسرع من الامل تزلزل الجبال
وتفتح المجال
للعدل والعمل
ويطلع خير بلدنا
على ذمة ولادنا
وتبقى عيشه جنه
وملو الصحن حنه
على كفوف الصبايا
واعيش عين الاعادي
قايمين للعز رايه
واقعد ويا الصحابه
ونقول على الربابه
ياجل الانجازات
ابو السقا .. مات
من شرب الميه
طين
-
اتجمعوا العشاق
اتجمعوا العشاق في سجن القلعة ... اتجمعوا العشاق في باب الخلق
و الشمس غنوة من الزنازن طالعة .. و مصر غنوة مفرعة في الحلق
تجمعوا العشاق بالزنزانة .... مهما يطول السجن مهما القهر
مهما يزيد الفجر بالسجانة .. مين اللي يقدر ساعة يحبس مصر
...............
تجمعوا و العشق نار في الدم ..... نار تحرق الجوع و الدموع و الهم
نار تشتعل لما القدم ينضم .... لما الايادي تفور في لم اللحم
و اللحم متنتور في رملة سينا .... و الكدب بيحجز على أيادينا
قدم العدو غارسة في لحم ترابي ... و الكدب عشش مخبرين على بابي
و المخبرين خارجين كلاب سعرانة ... بيجمعوا العشاق في الزنزانة
...............
مصر النهار يطلقنا في الميادين .. مصر البكا .. مصر الغنا و الطين
مصر الشموس الهالة من الزنزانين .. هالة و طارحة بدمنا بسا تين
مصر الجناين طرحة مين يقطفها .. مصر الجناين للي يرفع سيفها
مهما يطول السجن مهما القهر .. مهما يزيد الفجر بالسجانة
مين اللي يقدر ساعة يحبس مصر
اسكندريه
يا اسكندريه
بحرك عجايب
ياريت ينوبني م الحب نايب
تحدفني موجه
على صدر موجه
والبحرهوجه
والصيد مطايب
أغسل هدومي
وأنشر همومي
على شمسه طالعه
وأنا فيها دايب
كأني فلاح في جيش عرابي
مات ع الطوابي
وراح في بحرك
كأني نسمه فوق الروابي
م البحر جايه
تغرق في سحرك
كأني كلمه من عقل بيرم
كأني غنوه من قلب سيد
كأني جوا المظاهره طالب
هتف باسمك
ومات معيد
كأني صوت النديم
في ليلك
بيصحي ناسك
يشدوا حيلك
كأني طوبه من بيت في حاره
كأني دمعه
في عيون سهارى
كأني نجمه فوق الفناره
تهدي الحيارى
والبدر غايب
يا اسكندريه
يامصراويه
على سن باسم
على ضحكه هاله
البحر
شباك ومشربيه
وانتي الاميره
ع الدنيا طاله
يا اسكندريه عاشق
وبدوي
ارتاح في حضنك
والود ودي
يكون كلامي
عربون غرامي
وبالمحبه
ناخد وندي
يا اسكندريه فيكي الغلابه
ع الرزق يسعوا ولايناموش
صبح صباحهم
رجع مساهم
وزاد شقاهم
ومارتاحوش
يا عيني ع اللي الزمان تعبهم
وضاع تعبهم
ومالتقوش
نزل شبكهم
في بحر طامي
طلع شبكهم
على فاشوش
وفيكي بين البشر
ديابه
وفيكي فوق البشر
وحوش
وفيكي ناس مغرمين صبابه
لو خان زمانهم
مابيخونوش
وفيكي خمري
سلمت امري
ما اقدرش اشوفه
وما انيلوش
سمك يا بني يا اسكندراني
في العشق واحد
مالكش تاني
سمك يابني يا اسكندراني
في الحسن ساحر ومعجباني
سمك يابني
والعشـق غيه
تبدأ بنظره
تبقى ملاغيه
وكل عاشق وله بهيه
وكل شاعر وله اغاني
وأنا اللي عشق الصبايا كاري
أعشق وأغني ما اقدرش اداري
واي نظره بتجيب قراري
وايشحال عيونك
يا الاسمراني
-
اصحي يا مصر
اصحى يا مصر
اصحى يا مصر
هزى هلالك
هاتى النصر
كونى يا مصر وعيشي يا مصر
مدي اديكى
وطولى العصر
اصحي وكوني وعيشي يا مصر
اصحى يا عامل مصر يا مجدع
وافهم دورك
ف الوردية
مهما بتتعب
مهما بتصنع
تعبك رايح
للحراميه
جهدك عملك
رزق عبالك
عرقك مرقك
ولا يهنا لك
اصحى يا عا مل
غير حالك
صون المصنع
واصنع مصر
اصحى وكونى وعيشي يا مصر
اصحى يا زارع مصر الخضره
قدره وخضره
ونور وجمال
ابدر غيطك
واحمى البدره
ضد الافه
والاستغلال
ارضك عرضك
باب الدار
صبحوا مداسه
للسمسار
نعطش
ولانشربش عكار
وصفه قالوها الحكما يامصر
اصحى وكونى وعيشي يا مصر
واصحى يا جندى
يا تار الشهدا
عمى وخالك
اختى واخوك
لجل ما تهدا وتارك يهدا
فرغ نارك ف اللى خانوك
يابن الشعب يا حامي الشعب
انت املنا فى يوم الصعب
اصحى يا جندى ودق الكعب
حرر مصر وطهر مصر
اصحى وكوني وعيشي يا مصر
اغنيه بقره حاحا النطاحه
ناح النواح والنواحه
على بقرة حاحا النطاحه
والبقره حلوب
تحلب قنطار
لكن مسلوب
من أهل الدار
والدار بصحاب
وحداشر باب
غير السراديب
وجحورالديب
وبيبان الدار
وف يوم معلوم
عملوها الروم
زقوا الترباس
هربوا الحراس
دخلوا الخواجات
شفطوا اللبنات
والبقره تنادي
وتقول ياولادي
وولاد الشوم
رايحين في النوم
البقره انقهرت
في القهر انصهرت
وقعت في البير
سألوا النواطير
طب وقعت ليه
وقعت من الخوف
والخوف ييجي من ايه
من عدم الشوف
وقعت من الجوع ومن الراحه
البقره السمرا النطاحه
ناحت مواويل النواحه
على حاحا
وعلى بقرة حاحا
حبيبي يامجرم ياسافل
يادون
يارب السوابق
يارد السجون
رزالتك معاهم
ونمك عليهم
دا زائد جنانك
ونعم الجنون
جابولي وجابولك
وياما يجيبوا لنا
لأن البلد دي
حاكمها القانون
توقع مابيني وما بين
الحكومة؟
دي برضك حكومة
وانا ايش اكون
أديك رحت مورته
وحتروح بشرطه
وحيفسحوك
في جميع السجون
وانا مش ح ازورك
كما كنت فاهم
ولاكنت فاهم
ولايحزنون
-
الحمام الامري
الحمام الامري صبح ع البناني
قابل الصبح النور بالاغاني
والمعاني الحلوه رنت
في الخميله الصاحيه غنت
والقلوب القاسيه حنت
للأماني
كنت فين يافجر غايب كنت فين
والسؤال ف عنيه دايب دمعتين
والساعات في الليل طويله
ع السهاري في الخميله
والاغاني كل ليله
ولسه تاني
الأولة بلدي
الأولة بلدي
و الثانية بلدي
و الثالثة بلدي
الأولة بلدي باسلطن جو موالي و دا الموصوف
و الثانية بلدي باقول الكلمة بالعالي و ع المكشوف
و الثالثة بلدي ياكنزي و عزوتي و مالي و ملو الشوف
الأولة بلدي باسلطن جو موالي و دا الموصوف
دوا العيــــــــــــــــــــان
و الثانية بلدي باقول الكلمة بالعالي و ع المكشوف
و ف المليـــــــــــــــان
و الثالثة بلدي ياكنزي و عزوتي و مالي و ملو الشوف
آوانـــــــــــــــــــــك آن
تحدي الحد يا بلدي
ما بين الحق و البهتان
و رايتك تعلا يا بلدي
دليل عن صحة البنيان
و دا الموصوف
و الاولة بلدي
و الثانية بلدي
و الثالثة بلدي
التوبة
أتوب ازاي و أنا أيوب
رماني الوعد و المكتوب
سنين ماشي ورا الأفكار
على كفوف القدم دوار
لاخليت ف الدروب مشوار
و لا فوق الورق مكتوب
و أتوب ازاي
رماني الشوق مشيت سواح
أغني و ماو قلبي جراح
على يميني شجر صبار
على اشمالي مفيش أشجار
على قلبي الهوى جبار
و بات غالب
و أنا المغلوب
و أتوب ازاي
رماني الشوق مشيت حادي
حدايا و غنوتي بلادي
يا عيني يا ليلي
على انسان
غريب الأهل وف الأوطان
الجدع جدع
الجدع جدع
و الجبان جبان
بينا يا جدع
ننزل الميدان
و الميدان بعيد
عن جوف المدينة
يا تار الشهيد
ف الكنال و سينا
بحري و الصعيد
احنا أهله ادينا
أصلب م الحديد
ف الشدة تلاقينا
بالنار و السلاح
نرفع الكفاح
فوق كل العواصف
و هبوب الرياح
يسبق الليالي
و يجيب الصباح
يهزم الهزيمة
و يداوي الجراح
عايزين الصباح ؟
قدامكو الميدان
و الجدع جدع
و الجبان جبان
1969
الخواجة الأمركاني
الخواجة الأمركاني
و السماسرة اللي وراه
تخنوا بالكذب ودنه
و عرضوله مقاس قفاه
فهموه من غير ما يفهم
ان سوق الشرق مغنم
و الخواجة بطبعه مغشم
و المصاري معفرتاه
حب يعمل فيها تاجر
و يطلق يسلب و ينهب
ف الزباين بالنهار
يحدف الدولار يلمه
تلتميت مليون دولار
بالقزايز و البنات
باللبان
و البومبونات
بالمدافع و الدانات
أو بأفلام الرعات
قول بقى تاجر و فاجر
و انفلت لص المواشي
رعب ماشي ف البلاد
يشفط البترول و يطرش
كل ألوان الفساد
عزرائيل من غير فرامل
يقلب العرسان أرامل
حتى ف بطون الحوامل
كان يدبح الحياة
بالسناكي و الخناجر
و النهاية يا خواجة
من ف يوم كانت بداية ؟
البداية برضه لازم
بيجي يوم توصل نهاية
مهما زاد الرأسمال
الهلاك هو المآل
و التاريخ هو اللي قال
لعبت الموت ف الحيات
يسحب الروح ف الحناجر
-
الربيع
يطوف الربيع
صغير بديع
و ينهي المطاف
اذا العدل طاف
و شاف الجميع
تعيش الزهور
اذا الدنيا نور
و تملا الخمايل
و تطرح مودة
عدد كل وردة
و تعمل عمايل
أحبك يا بلدي
و أحبك ربيع
شبابك مصحصح
و جوك بديع
و نيلك موافي
لحد الحوافي
يسافر يوافي
و يسقي العطاش
شجر تمر حنة
و شجر دقن الباشا
و تخضر أرضك
بطولك وعرضك
و تعلا السنابل
و تكسي الغيطان
و تشدي البلابل
و تملا الودان
يا مصر انت جنة
ربيعك فتنا
مشاتل مشاتل
سنابل و حنة
مجرد أماني
ياقلبي يا والع
مدام انت ثاني
مخضر و طالع
بلون الربيع
يطوف الربيع
صغير بديع
و ينهي المطاف
اذا العدل طاف
و شاف الجميع
1966
السندباد
حكيم عليم مخلص جسور
طاير على جناح العصور
داير كما يدور الدولاب
و را التاريخ من الجدور
يطلع جبال
يقطع شعاب
يغوص ف أغوار البحور
ينبش بعينه ف الكتاب
يقر الشواهد ع القبور
و لما عاد السندباد
رمى السلام و قال كلام
و اسمع كلامه و حلله
تلقاه بسيط من أوله
تعمل حويط و تأوله
تطلع غشيم
قال الحكيم
العمر ماشي و كل ماشي و له مداه
و كل فرد و له بدايته و منتهاه
الشعب هو الباقي حي
هو اللي كان هو اللي جي
طوفان شديد لكن رشيد
يقدر يعيد صنع الحياة
و الشعب لما يقول يا أصحاب العقول
نسمع و نوعى و نحترم صوت الاله
1970
الشربة العجيبة
الشربة العجيبة
البلي بم بم
والبلي باه
قالك ايه
قالك آه
شربة عجيبة
من تركيبة بلدي
يابلد البلي بلي با
قالك ايه
قالك آه
شوف يا مواطن
شوف يا أمير
واسبق شوفك بالتفكير
ناس بيقولو السرف بير
آدي البير
و آدي غطاه
و البلي بم بم
والبلي باه
قالك ايه
قالك آه
قالك كل الفول بيقوّت
قالك حشو المعدة يموت
قالّك صهين
قالك فوّت
كل دا كذب اناس كاشفاه
زي ماكشفو البلي بلي باه
قالك ايه
قالك آه
قالك يا مواطن يا ولداه
زاده الفول لازم تلقاه
عنده البنكرياس بطال
و الامساك فوق الاسهال
عنده الرهقة
عنده الدوخة
عنده انيميا
عنده عيال
قالك ثم الجهل مصيبة
مولّف ويا العيا تركيبة
تشرب منها تعطش تاني
تشرب تعطش
تشرب تاني
تعطش تشرب خمسة ف ستة
مية نار لو طالت جتة
لازم تلحس أسمن حتة
يعني العقل يا خلق الله
آدي البير
و آدي غطاه
البلي بم بم
والبلي باه
قالك ايه
قالك آه
قالك تصبر ع المكتوب
زي ما صبر النبي ايوب
يعني تسليم للميكروب
ياخد رزقه ـبفضل الله ـ
يفضل ينحل وبرك لما
تتفرط من وسط اللمة
خايخ ينخب السوس ف عضاك
خلا قوايمك ماهي شيلات
ويعالجوك الناس
بالصبر
مع انك عيان
بالصبر
قومك صبر
نومك صبر
لحد القبر يا حول الله
وحياتك م الدار للنار
تتولف عند العطار
يسقيك الحكمة ف اشعار
ويركب م الصبر دواره
وتقربع والداء عمال
ف عصام الابعد نحال
وتخلف للبوس عيال
وبهيه صبية ياولداه
آدي البير وآدي غطاه
والبلي بم بم والبلي باه
قالك ايه
قالك آه
بعد الكشف بميكروسكوب
شفنا التوب وما تحت التوب
تشكيلة امراض عشناها
واليكم في اللآتي دواها
وصفة عجيبة
من تركيبة بلدي
يا بلد البلي بلي باه
قالك ايه
قالك آه
وجع الراس جنعلجه بايه
قالك تدي التاس القوت
قالك طب والجهل يابيه
قالك سيب الكمة تفوت
فالك طب حتفوت الزاي
قالك لما الضلمة تموت
طب الضلمة تموت من ايه
قالك لازم بالنبوت
والنبوت حنجيبه منين
قالك لما نهز التوت
قالك قدر خفنا نهز
قالك نشرب صبغة يوت
حتطهر ايوب من صبره
وتفجز كبد المكبوت
وتفوق يونس من نومه
ويفلفص من بطن الحوت
آدي البير
آدي غطاه
وآدي وجعنا
وآدي دواه
البلي بم بم
والبلي باه
قالك ايه
قالك آه
-
الشيخ امام
دور يا كلام على كيفك دور
خلي بلدنا تعوم ف النور
ارمي الملمة ف بطن الظلمة
تحبل سلمى و تولد نور
يكشف عيبنا
و يلهبنا
لسعة ف لسعة
نهب نثور
دور يا كلام على كيفك دور
عم دياب
شايل غاب
و مسوح ف بلاد الناس
من شوق نوله
يعزل قوله
و يغني مرفوع الراس
بلدي يا نبع النور سلسال
يسقي الفكرة للأجيال
بلدي يالقمة عيش يا حلال
ع الأكالة
و ع الأكال
يا أم النيل سايل
مواويل
كل مغني و له موال
و أنا أرغولي لما يمول
سوى ف الأخر
سوى ف الأول
مش حيغني الا
يا مصر
يا ركوبة ركاب النصر
سرقوكي سكان القصر
و الضابط
عبد المأمور
دور يا كلام على كيفك دور
الطنبور
زهر الجناين طرح
و العتر مش واحد
مع ان أصل الشجر
طالع ف غيط واحد
و الحب لما انبدر
مسقي بماء واحد
عجبي على فرعين
كان أصلهم واحد
واحد عرز ف الطين
و اللي سرح واحد
و الورد لما انقطف
يا رب يا واحد
ريحت بيه أولوفات
و اللي تعب واحد
بسيطة جاوي جاوي
رواية المجالة
مليحة جاوي جاوي
للي ما نايمشي
طويلة جاوي جاوي
حكاية الرسالة
جريبة جاوي جاوي
و انت ما عالمشي
مد الخطوة و امشي
تلجى الصعب فات
غير الله ما دامش
و كل حي مات
و ان كنت ناصح
و فهمت المجالة
مهمها يا ابني للي ما فاهمشي
بسيطة
كيف الدنيا لف و دور يا طنبور
هم شوية خلي المية تغطي البور
معدودة الخطاوي
رايحة و لا جاية
ما يملكشي خوفك
ع الدنيا الدنية
جول الكلمة عالي
بالصوت البلالي
جول ان العدالة
دين الانسانية
كامش و خايف
فرج الشفايف
هو العمر واحد
و لا العمر مية
و ان كنت ناصح و فهمت المجالة
فهمها يا ابني للمفهمشي
بسيطة
كيف الدنيا لف و دور يا طنبور
هم شوية خل المية تغطي البور
المولى خالجنا بالعدل و ناشينا
طل ف خلجة تلجاه
بالعجل مساوينا
و منور طريجنا
من فضله و هادينا
بالنور اللي طالل من غرة نبينا
جن الليل غوانا
و مشينا ف عمانا
و نسينا شارعنل و تهنل ف المدينة
و ان كنت ناصح و فهمت المجالة
فهمها يا يا ابني للي ما فهمشي
بسيطة
كيف الدنيا لف و دور يا طنبور
هم شوية خلي المية تغطي البور
يا مودر شبابك
بسنين العذاب
بين وهم الأماني
و الصبر اللي شاب
صبر ع المساوي
بيزيد البلاوي
تبجى انت المصيبة
و تبجى انت المصاب
يا ويلك بصبرك
ع الظالم و ظلمه
ف الدنيا
و يويلك من يوم الحساب
و ان كنت ناصح و فهمت المجالة
فهمها يا يا ابني للي ما فهمشي
بسيطة
كيف الدنيا لف و دور
يا طنبور
هم شوية خلي المية تغطي البور
1971
الغربة
يا غربة روحي روحي
لا تحطي على سطوحي
و سطوحي يطلع فدان
و الفدان يحتاج مروى
و المروى عرق الانسان
و الانسان يحتاج ثروة
و الثروة ف غيط الفلاح
و العامل صاحب المفتاح
و المفتاح يفتح جنة
و الجنة فيها الحنة
يا حنة يا محنية
عشقوكي الجناينية
زرعوكي خضرة خضرة
م البدرة للقطفية
و عجنوكي حمرة حمرة
للسمرة و الخمرية
و السمرة طرحت بستان
و البستان لا بس فستان
و الفستان طاقه طاقه
أحمر أخضر يا رفاقه
و رفاقي يا كل الناس
من كل الناس و الأجناس
ع الحنة واقفين حراس
و الحنة على سطوحي
يا غربت روحي
روحي
القاهرة أغسطس ) أب ( 1978
الفاعل
دللي الشيكارة
دنب الشيكارة
واجعد يا حفني ولع لك سيدارة
فكر شوية
في العيشة دية
ايه الجضية.. ايه العبارة
من صغر سني
شجيان لكني
مالط سني غير البصارة
ودخلت حارة
من دوه حارة
وف كل حارة
عليت عمارة
وسط المعاول
بنا و مناول
بس المجاول
كلني بشطارة
و لا خلا صرة
و لا لجمة حرة
و العيشة مرة
آخر مرارة
-
الفوازير
شاعر بيتخن من بوزه
ممكن تخوف به عيالك
نازل يقزقز أزا أوزو
حتتك يمينك وشمالك
بقي مليونير
واللي يعوزه
يلقاه في إيده
عقبالك
وخلي بالك من زوزو
وخلي زوزو من بالك
------------
يا ولية عيب اختشي
ياشبة إيد الهون
دانتي اللي زيك مشي
يامرضعة قلاوون
مدحتي عشرين ملك
وميت وزير ورئيس
مروان
وعبد الملك
والمفتري
وعتريس
بتغني بالزمبلك ؟
ولا انتي صوت إبليس
من أول المبتدأ
حتي نهاية الكون؟
-------------
اللورد بن اللورد بن اللورد
ابن اللورد
متأصل في الثروة
لا أونا سيس
ولا فورد
حيطبق بسلامته
قوانين لا شتراكيه
ويدافع (( من عشمه ))
عن صوت الحريه
واهي كوسه
علي باميا
علي قرع استامبوللي
بتفرع يا بلدنا
علي وش التسقيه
----------
سكرتير عموم مصر
وافهم كلامي
تعدد مناصبه
ولا تنتهيش
وجيه بالوراثه
وجاهل عصامي
جمع جهل طايل
وإيه ؟
من مفيش
وكان أصله ظابط
وحول حرامي
ويكتب أدب
بس ما يتقريش
---------------
لماليمو الشخلوعه
الدلوعه الكتكوت
الليله حيتنهد
ويغني ويموت
يشيلوه قال علي لندن
علشان جده هناك
من بعد ما يتلايم
علي دخل الشباك
ويهرب أموالك
ويقولك أهواك
يا شعب يا متلوع
ع الهدمة وع القوت
-------------
ينسونه المتبعتر
ما لقاش أب يلمه
إبن امه
بس امه كانت اجدع من أمه
باع نفسه بخسارة
ما قابلش المعايرجي
كان مالك أفكاره
واتعين تفكيرجي
والحاجه اللي تحير
طب إيه اللي اتغير
كان كاتب سرايرجي
واتحول شماشرجي
------------
يكون في عون الصحافه
الله يكون في العون
لمالك يا دود القرافة
يا رمه يا ملعون
ينهش لحوم الفرايس
في الضلمه
يا وطواط
والكلمه عندك بضاعة
أما الشرف مطاط
بريئه منك بلدنا
مسلمين واقباط
ولا انت موسي
ولا انت
من كلاب فرعون
------------
مجاول وشاعر
وبياع ملوحه
وتاجر غناوي
وسمسار بنات
نعيمه وزكيه وعطيات وتوحه
ومخبر مودك
علي التجريرات
حضر من بلدهم
بمقطف ملوحه
جبر
واشتراله
تلات تاكسيهات
يتوب علي دي البلد
منك وأمثالك
ما عدش لينا جلد
علي سو أفعالك
الفن للمعركه
عبيته في البلا ليص
وصحافة المعركه
في الكدب والتهجيص
ومليت طريق الهرم
يا عرص
بالتعريص
ما دام ما فيش للهرم
صاحب
هنيا لك
-------------------
لأن الصراحه ف بلدنا قليله
بفضل المباحث
وأدب الرموز
جعلها اللئيم ابن بنت اللئيمه
شعار يرمي تحته السموم كيف يعوز
وبهدل اصول
الصراحة العظيمه
وخلا الندوب
في الحقايق
يزور
وحرم وحلل
وكتر وقلل
وسمى القبيله الذليله
حليمه
وقال ع السكوت ع الهزيمه
يجوز ؟
-
الفول وا للحمة
عن موضوع الفول واللحمة صرح مصدر قال مسئول
ان الطب اتقدم جدا والدكتور محسن بيقول
ان الشعب المصري خصوصا من مصلحته يقرش فول
حيث الفول المصري عموما يجعل من بني ادم غول
تأكل فخده في ربع زكيبه والدكتور محسن مسئول
يديك طاقة وقوة عجيبة تسمن جدا تبقى مهول
ثم اضاف الدكتور محسن ان اللحمه دي سم أكيد
بتزود أوجاع المعدة وتعود على طولة الايد
وتنيم بني ادم وتفرقع منه المواعيد
واللي بياكلوا اللحمة عموما حيخشوا جهنم تأبيد
يادكتور محسن يامزقلط يامصدر ياغير مسئول
حيث ان انتو عقول العالم والعالم محتاج لعقول
مارأى جنابك وجنابهم فيه واحد مجنون بيقول
احنا سيبونا نموت باللحمة وانتو تعيشوا وتاكلوا الفول
مارأيك ياكابتن محسن مش بالذمة كلام معقول
القضية
الحكاية والرواية
و القضية والجناية
و الفانلة ف الجونلة
و المخدة ف الملاية
و الارادة
بالشطارة
و الخسارة
ع التكايا
و الأمين مهلباتي
و الأمانة مهلباية
و الصحافة مهلبية
و الاذاعة يا ضناية
ألف ليلة وليلة تندب
ع الهوى
و تقول هوايا
و المشايخ كل شايخ
ف الفساد
يهدي الهدايا
و القناعة
للجواععى
و البضاعة
للهبايا
و البوليس ف اليغمة طايح
بالطبنجة و العصاية
ديب غريب
من غير كمامة
يهبش التوب و العباية
و القضية
يا قضايا
بالمكايد و الوشاية
دبروها و فصلوها
بالمقاس
لبست قضايا
و العدالة بالندالة
عطلوها و هي جاية
و الحكاية و الرواية
و القضية و الجناية
الحكاية عايزة قعدة
و الكلام
ملوش نهاية
الحكاية ان البلد
مش ملك ناسها
و الخلايق ف البلد
مش مالكة راسها
و البلد أصلا
بلدنا مش عليلة
البلد علتها جاية
من خرستها
شوف يا صاحبي
ما انت شايف كل حاجة
بس خايف
الحقيقة بنت كلمة
و الكلام لازم يدور
سندباد مواله عالي
ف المداين .. و الكفور
الكلام الكلام
يكسر القيد و اللجام
الكلام الكلام
يدفع الناس للأمام
شوف يا صاحبي
هي كلمة
دايرة ف وسط الزحام
البلد مش عايزة قعدة
و كل منهو بكلمتين
البلد عايزة المجاهدة
باللسان
و بالادين
كلنا و من غير معهادة
للبلد علينا دين
يكبسونا
يحبسونا
يضربونا كرباجين
البلد سامعة و شاهدة
و كل خرم قصاده عين
1969
المرجيحة
يا عم ادريس
يا عم ادريس
يا بو المرجيحة و القواديس
ما جاش الدور
عشان يطلع قادوس لفوق
وابوس النور
و اطفي للعلالي شوق
و أغني ف الهوا موال
على ورد الخدود و الخال
و أدوق الحب سحر حلال
و أشوف الدنيا و أبقى عريس
يا عم ادريس
يا عم ادريس
يا عم ادريس علي الدور
ادور و اطلع مع الطالعين
كفاية سنين يا عم ادريس
يا عم ادريس كفاية سنين
و انا و عيال كما العصافير
رفاقة كلنا و فرافير
يا دوب يعلا الجناح بينا
يعدينا القادوس و يطير
و نرجع تاني
لا فرحنا
و لا عرفنا الطريق من فين
و جينا زي ما رحنا
حيارى و محرومين لتنين
نداوي بالقنا جرحنا
و نرمي اللوم
على الجناحين
و جرح النفس له وجعين
يبكي القلب
قبل العين
و قاضي الحظ له شرعين
لأهل البخت
و المتـــاعيس
يا عم ادريس
يا عم ادريس
و آه بختنا يشوفنا
و نرمي الوهر يدينا
و قاضي الحظ ينصفنا
و يحكم بالأمل لينا
و نتمرجح على كيفنا
و ينساب القادوس بينا
ياخودنا بعيد و يحدفنا
و عند الشمس يرمينا
و يبقى الجو هليلة
تلعلع فيه غناوينا
و نبدر ف الهوا حبه
تقول للهم يتجنى
و ترقص ف الفضا القواديس
يا عم ادريس
يا عم ادريس
سجن القناطر ـ سبتمبر 1971
اليويو
يا واد يا يويو
يا مبرراتي يا جبنة حادقة على فول حراتي
آستك لسانك
فارد ولامم
حسب الأبيح يا مهلباتي
يا واد يا يويو يا مهلبية
فوق الصواني
سايحة و طرية
في كل جلسة تلبس قضية
و تخيل عليها أوي يا مشخصاتي
يا واد يا يويو يا مبرراتي
حسب الوظيفة وانت و شطارتك
تظهر حلاوتك
تظهر مرارتك
لو خفضوك ترتفع حرارتك
لو صعدوك حالا
تنقلب جيلاتي
يا واد يا يويو يا مبرراتي
و بالمناسبة
و انت اللي أدرى
كان لك تحفظ على المبادرة
ليه النهاردة
بترش بدرة
يا ابن الأبالسة
يا ملطفاتي
يا واد يا يويو يا مبرراتي
و النهاية
لك عندي كلمة
آخر طريقك زحل و ضلمة
حيث ان آخر القرع ضلمة
يا اما كفتة طرية
من عند العجاتي
يا واد يا يويو
يا مبرراتي
-
انا اتوب عن حبك ؟
أنا اتوب عن حبك أنا ؟
أنا لي ف بعدك هنا ؟
دنا بترجاك
الله يجازيك
يا شاغلني معاك
وشاغلني عليك
وان غبت سنه
أنا برضه أنا
لا اقدر أنساك
ولا لي غنا
ولا اتوب
عن حبك أنا
زي ما يحلالك
زي هواك
سهرني عليك
سهرني معاك
دنا عمري ما اخاف من هجرك يوم
ولا قلبي بيفرح ونا وياك
وان كان أمل العشاق القرب
وأنا أملي ف حبك
هو الحب
وان غبت سنه
أنا برضه أنا
لا اقدر أنساك
ولا لي غنا
ولا اتوب عن حبك انا
أنا لا اتمنيت
ولا قلت يا ريت
ولا بعدك عني
جعلني سليت
دنا كل منايا أدوق اللوم
ويقولوا علي الناس
حبيت
وان كان أمل العشاق القرب
وأنا أملي ف حبك
هو الحب
وان غبت سنه
أنا برضه أنا
لا أقدر أنساك
ولا لي غنا
ولا اتوب عن حبك أنا
تخاصمني كتير
نصالحني كتير
كل دا يا حبيبي ما لوش تأثير
توصلني سنين
تهجرني سنين
ما تغيرنيش
دنا حبي كبير
وان كان أمل العشاق القرب
أنا أملي في حبك
هو الحب
وان غبت سنه
أنا برضه أنا
لا اقدر انساك
ولا لي غنا
ولا اتوب
عن حبك أنا
أهيم شوقا
زمان لما افترقنا ليل الطريق سرقنا وتهنا في المسالك
انا المجروح وانتي حزينه زي ماانتي عنيده في امتثالك
تعبنا ياحبيبتي تعبنا م العناد طريق واعر فرقنا وتهنا في البلاد
مع انك ياحبيبتي حياتك في الوداد وانا عارف نهايتي في البعاد
عذابك وحشني وعشقك هبشني وقلبك فرشني جناين وقمره
راجع لك ياسمرا
اهيم شوقا اعود شوقا الى لماكي وسلسبيلي
ياسمرا ياللي الهوى رماني
وتهت فيكي وضاع زماني
يحدفني بحرك لبر تاني
يجيبني شوقي او تندهيلي
اهيم شوقا اعود شوقا الى لماكي وسلسبيلي
هربت منك لقيتني فيكي
بعدت عنك قربت ليكي
سهرت وحدي اتونست بيكي
غلب حماري وتاه سبيلي
اهيم شوقا اعود شوقا الى لماكي وسلسبيلي
بتكات
بوتيكات النات كوا النَّات
وشقق مفروشه وعمولات
يا حلاوه الناوه كوا الناوه
يا بلدنا يا آخر فتاكات
بوتيكات النات كوا النات
**
شبيك لبيك فتح مخك
لبيك شبيك غمض عينك
حتقفّل مخك ح نطخك
ونلوشك لو تفتح عينك
ركب قرنين تركب مازدا
وتعيش سلطان في البرواز دا
مش عاجبك فالجبنه الفازده
والعيش والفول والكرَّات
يا حلاوه الناوه كوا الناوه
يا بلدنا يا آخر فتاكات
بوتيكات النات كوا النَّات
مين فيكوا ما يعرفش عليوه
شيّال المينا الكحيان
في ثواني اتمول واتحول
بقي مسيو عليوه عليَّان
إزاي؟
ما هي بوظه ومفتوحه
على حس ولاد المفضوحه
وأرانب صاحيه ومدبوحه
تتأستك تبيع البنوكات
يا حلاوه الناوه كوا الناوه
يا بلدنا يا آخر فتكات
بوتيكات النات كوا النَّات
• حتقول الفقرا ومشاكلهم
دي مسائل عايزه التفانين
وأنا رأيي نحلها رباني
ونموّت كل الجعانين
وبهذا ما حدش
ح يجوع
لو نعلن هذا المشروع
وح نقفل هذا الموضوع
نهائياً
ونعيش في تبات
يا حلاوه الناوه كوا والناوه
يا بلدنا يا آخر فتكات
بوتيكات النات كوا النات
سجن الاستئناف/ 1981
برولوج
يا ليل يا عين معرفش اكذب
طب و اكذب ليه
عدم المؤاخدة
لنا بكتب
و لا أبصرايه
لا أنا احترافي اشتراكية
و لا عندي نزعة رجعية
لكني شايف بعنيه
يا فلاحين يا صنيعية
بر الأمان بان
و المراكب
راح ترسي عليه
و انا حاكذب ليه
1971
بكائية يناير
أنا رحت القلعة و شفت ياسين
حواليه العسكر و الزنازين
و الشوم و البوم و كلاب الروم
يا خسارة يا أزهار البساتين
عيطي يا بهية على القوانين
أنا شفت شباب الجامعة الزين
أحمد و بهاء و الكردي و زين
حارمينهم حتى الوف بالعين
و ف عز الظهر مغميين
عيطي يا بهية على القواننين
و قابلت سهام
ف كلام انسان
منقوش و مأثر ف الجدران
عن مصر و عن عمال حلوان
مظاليم العهد المعتقلين
عيطي يا بهية على القوانين
و قابلت هناك عزت و جواد
و قابلت كمان منذر و دياب
أربعة أبطال شنقوا الجلاد
التل يا هوذا الفدائيين
زغرطي يا بلدنا لدول مساجين
و اسمعي يا بلدنا خلاصة القول
و باقولك أهه و أنا قد القول
مش ممكن كد
حيحول الحول
على كد و الناس يفضلوا ساكتين
خليكوا شاهدين
خليكوا فاكرين
أنا رحت القلعة
و شفت ياسين
معتقل القرية 10 فبراير 1972
-
بهية
يسبق كلامنا سلامنا يطوف ع السامعين معنا
عصفور محندق يزقزق كلام موزون و له معنى
عن أرض سمرة و قمرة
و ضفة نهر و مراكب
و رفاق مسيرة عسيرة
و صورة حشد و مواكب
ف عيون صبية بهية
عليها الكلمة و المعنى
مصر يا أمة يا بهية
يا أم طرحة و جلابية
الزمن شاب
و انتي شابة
هو رايح
و انتي جية
جية فوق الصعب ماشية
فات عليكي ليل و ميه
و احتمالك هو هو
و ابتسمتك هي هي
تضحكي للصبح يصبح
بعد ليلة و مغربية
تطلع الشمس تلاقيكي
مفجبانية وصبية
الليل جزاير جزاير
يمد البحر يفنيها
و الفجر شعلة حتعلا
و عمر الموج ما يطويها
و الشط باين مداين عليها الشمس طوافة
ايدك ف ايدنا ساعدنا
دي مهما الموجة تتعافى
بالعزم ساعة جماعة
و بالاصرار نخطيها
مصر يا أمة يا سفينة
مهما كان البحر عاتي
فلاحينك ملاحينك
يزعقو للريح يواتي
اللي ع الدفة صنايعي
و اللي ع المجداف زناتي
و اللي فوق الصاري كاشف
كل ماضي و كل آتي
عقدتين و الثالثة ثابتة
تركبي الموجة العفية
توصلي بر السلامة
معجبانية و صبية
يا بهية
و يعود كلامنا بسلامنا يطوف ع الصحبة حلواني
عصفور محني يغني على الافراح و من ثاني
يرمي الغناوي تقاوي
تبوس الأرض تتحنى
تفرح و تطرح و تسرح
و ترجع ثاني تتغنى
اللي بنى مصركان ف الأصل حلواني
1971
بيرم
ياعيون الشعر الصافي
يابحور هايجين مايجين
ماشيين في طريقك دايما
وح نفضل كده ماشيين
ع الدرب اللي انت سلكته
بالليل والناس نايمين
وان كنا نقول ونزود
ونجود في المضامين
بيكون الفضل لبيرم
أسس واحنا الطالعين
وح نرجع تاني نغني
ونقول ويا الملايين
يا بهيه وخبرينا .. ع اللي جتل ياسين
جوازة
شعبان البقال
عقبال الأنجال
اتوظف و اتنظف
و اتعدل له الحال
من بعد الجلابية
و الفوطة الدبلان
ف رقبته المهرية
من هبش الأكلان
و الدوحة الأزلية
و النوم ف الدكان
بقى صاحب
عربية
و عمارة
و سكان
تلقاه للصحبية
سهران
ع الكونكان
و ينام للعصرية
كبقيت الأعيان
و سألت الخضرية
و بتوع الدخان
ع الحكمة الالهية
في نظافة شعبان
و عرفت ان اخانا
شعبان ابن بهانة
ااتجوز فنانة
و اتعين فنان
جيفارا مات
جيفارا مات
جيفارا مات
آخر خبر ف الراديوهات
و ف الكنايس
والجوامع
و ف الحواري
و الشوارع
و ع القهاوي وع البارات
جيفارا مات
جيفارا مات
و اتمد حبل الدردشة و التعليقات
مات المناضل المثال
يا ميت خسارة ع الرجال
مات الجدع فوق مدفعه جوة الغابات
جسد نضاله بمصرعه
و من سكات
لا طبالين يفرقعوا
ولا اعلانات
ما رأيكم دام عزكم
يا انتيكات
يا غرقانين
ف الماكولات و الملبوسات
يا دفيانين
ومولعين الدفايات
يا محفلطين
يا ملمعين يا جميسنات
يا بتوع نضال آخر زمن
ف العوامات
ما رأيكم دام عزكم
جيفارا مات
لا طنطنة
و لا شنشنة
و لا اعلامات و استعلامات
عيني عليه ساعة القضا
من غير رفاقة تودعه
يطلع أنينه للفضا
يزعق و لا مين يسمعه
يمكن صرخ من الألم
من لسعة النا ف الحشا
يمكن ضحك
أو ابتسم
أو انتشى
يمكن لفظ آخر نفس كلمة وداع
لجل الجياع
يمكن وصية للي حاضنين القضية
بالصراع
صور كثير ملو الخيال
و ألف مليون احتمال
لكن أكيد و لا جدال
جيفارا مات موتة رجال
ياشغالين و محرومين
يا مسلسلين
رجلين و راس
خلاص خلاص
ما لكوش خلاص
غير بالبنادق و الرصاص
دا منطق العصر السعيد
عصرالزنوج و الأمريكان
الكلمة للنار و الحديد
و العدل اخرس أو جبان
صرخة جيفارا يا عبيد
في أي موطن أو مكان
ما فيش بديل
ما فيش مناص
يا تجهزو جيش الخلاص
يا تقولو ع العالم
خلاص
1968
حلا ويللا
حلاويلا يا حلاويلا .. يا خسارة يا حول الله
الثوري النوري الكلمنجي .. هلاب الدين الشفطنجي
قاعد في الصف الاكلنجي ... شكلاطة و كاراميلا ..
يتمركس بعض الايام ... يتمسلم بعض الايام
و يصاحب كل الحكام .. و بسطعشر ملة ..
حلاويلا يا حلاويلا .. يا خسارة يا حول الله
يا حلاولو لو شفتو زمان .. مهموم بقضايا الانسان
بيتكتك لتقول بركان .. و لا بوتجاز و لا حلة ..
حلاويلا يا حلاويلا .. يا خسارة يا حول الله
اش حالك يا قريبي اليوم .. واش جاب التفاح للدوم
و اش جاب الأوضه ببدروم ... للعربية و فيلا
حلاويلا يا حلاويلا .. يا خسارة يا حول الله
جرانين و مسارح و ادارة .. و معلق طلبة و زمارة
يسلك اهو بيزمر .. يعطل يجيبوا المنافيلا
حلاويلا يا حلاويلا .. يا خسارة يا حول الله
وا ترستق هلاب الدين .. بقى عاقل جداً و رزين
و ياعيني علينا يامجانين .. عشنا و متـنا بعلة
حلاويلا يا حلاويلا .. يا خسارة يا حول الله
-
رجعوا التلامذه
رجعوا التلامذة
يا عم حمزة للجد تاني
يا مصر إنتي اللي باقية
و انتــــــــــي
قطف الأماني
لا كورة نفعت
و لا أونطة
و لا المناقشة و جدل بيزنطة
و لا الصحافة و الصحفجية
شاغلين شبابنا
عن القضيـــة
قيمولنا صهبة يا صهبجية
و دوقونا طعم الأغاني
رجعوا التلامذة
للجد تـــــــاني
طلعوا التلامذة ورد الجناين
اسمع يا ميلص و شوف و عاين
ملعون أبوك ابن كلب خاين
يا صوت أميركا
يا أمريكانـــــــي
رجعوا التلامذة يا عم حمزة
للجد تانــــــــــي
يا مصر إنتي اللي باقية و انتــــــــــي
قطف الأمانــــي
رسالة إلى الحدود
واه يا عبد الودود
يا رابص ع الحدود
و محافظ ع اللظام
كيفك يا واد صحيح
عسى الله تكون مليح
و راجب للامام
أمك ع تدعي ليك
و ع تسلم عليك
و تجول بعد السلام
خليك ددع لابوك
ليجوا مين دابوك
و يمصخوا الكلام
واه يا عبد الودود
ع أجولّك و انت خابر
كل الجضية عاد
ولسة دم خيك
ما شرباش التراب
حسك عينك تزحزح
يدك عن الزناد
خليك يا عبده راصد
لساعة الحساب
أن الأوان يا ولدي
ما عاد الا المعاد
تنفض الشركة واصل
وينزاحوا الكلاب
عايزني أكون أبوك
بتديب لي ثار اخوك
و الأهل يبلغوك
دميعا السلام
واه يا عبد الودود
كيفك و كيف زمايلك
عسى الله طيبين
خالك زناتي داي لك
ضمن المطوعين
و اختك تطلع يوماتي
ع المستشفى الجديمة
حاكم ع يمرنوها ف العركة
تكون حكيمة
و محمدين موافي
يتعلم المطافي
ويجولك شد عزمك
ويجولك العوافي
ومن هنا الجرايب و العيلة و العيال
ع يبلغوك سلامهم و لتمتة الردال
و آخر الكلام نجولك في الختام
الله يصون بلدنا
و يحرص السلام
والدك حسن محارب
غفير برد الحمام
ساتيا جراها
الى روح المهاتما غاندي الفقير
الطي حرر الهنك بةلمو سلام
ساتيا جراها
ساتيا جراها
تبري السقم
وتشفي العاهة
لف المغزل تاني تاني
اغزل توبك
و اغزل تاني
ملعونة السلعة البراني
و اللي جلبها
و اللي قناها
ساتيا جراها
يا ولاد الهند
يا غافلين
و بقى لكم ع الحال دا
سنين
البقرة تحت السكين
و خلاصها ف كلمة و معناها
ساتيا جراها
ساتيا جراها تعني سلام
لا سلبية و لا استسلام
لكن خطوة تسير قدام
بالشعب ان هب و خطاها
ساتيا جراها
تجمع شعب اتغرب
تاه
ضاع من بعضه
يا ولداه
مش فاكر غير كلمة آه
من علة استعصت
و دواها
ساتيا جراها
ساتيا جراها
سلام للأرض
سلام يا أرضنا
يا غطان الفلاحين
يا مصنع الصنايعي
يا بحور الصيادين
يا مدرسة يا جامعة
سلام و الدنيا سامعة
ينور ألف شمعة
ف ليل الحيرانين
و يبدد الظلام
سلام سلام سلام
سلام يادين قوية
خشنين و عرقانين
ينامو المغربية
و يقوموا مبدرين
يخضرو الجناين
و يطيرو الحمايم
و يعمرو المداين
و يضيعو ف الزحام
سلام يحمي الحياة
و صناع الحياة
ز يظيك الانتباه
ف الناس الذيبين
للحق و السلام
سلام سلام سلام
سلام يا أرضنا
يا جنات الزتون
يا أغلى عندنا
من حبات العيون
سلام نحميه بروحنا
و نصونه ف القلوب
و نداوي به جروحنا
احنا و كل الشعوب
سلام يطرح أماني
و يزوق الأغاني
و يروق الأناني
و يسقي العطشانين
بالعدل و السلام
سلام
سلام
سلام
1971
شال الهوى
شال الهوى بينا
حط الهوى تاني
و احنا و السفينا
في بحر الأماني
عمي يا للي ماشي
ع الشط القريب
قوللي و انت ماشي
لأ و طيب
حبي راح ماجاش
مش حييجي تان
شال الهوى بينا
حط الهوى تاني
شال الهوى شاله
بان المستخبي
شاف قلبي نداله
يا عيني يا قلبي
حط الهوى شاله
خبى السحر عني
هو الهوى ماله
داير باله مني
كل ما يلاقينـــــــــــي
اشوف عينه تراعيني
كأنه بينادينــــــــــــي
أفوت أهلي و جيراني
شال الهوى بينا
حطالهوى تاني
شال الهوى شيلة
حطالهوى حطه
هما يوم و ليلة
كان فرش و غطى
شال الهوى بيا
من بين الحبايب
حط الهوى بيا
و أنا قلبي دايب
و التقيتني ماشي
أدور ما التقاشي
و اللي راح ما جاش
فكرني و نساني
شال الهوى بينا
حط الهوى تانى
شال الهوى بينا
رحنا عشمانين
حط الهوى بينا
جينا عطشانين
يا عشاق بلدنا
يا ولاد الغرام
لا رحنا استفدنا
و لا جينا بسلام
خدنا الهوى رحنا
و احنا زي ما احنا
و ارجعنا بجراحنا
و بحبة أماني
شال الهوى بينا
حط الهوى تاني
سجن القناطرـاغسطس1971
شرم برم
أنا الأديب الأدباتي
غايظني حال بلدياتي
و غلبت أوحوح و أهاتي
لكن بلدنا
سمعها ثقيل
الله الله يا بدوي
هات الشخاليل
شرم برم
و الناس غافلة
و الغفلة
ع الأفهام قافلة
و الكذب لعلع ف الحفلة
و أغلب السامر مساطيل
الله الله يا بدوي
دق الشخاليل
حالتنا ما تسرش انسان
و حالنا
يصعب ع الغلبان
لكن يا خلق علينا لسان
لو جريناه ع الصلب
يسيل
الله الله يا بدوي
يا أم الشماليل
السوس نخب سقف العشة
و عضمة الغنمات
هشة
عايزين صابونة و مقشة
و هات ياكنس
و هات يا غسيل
الله الله يا بلدي
مشوارنا طويل
آدي العبارة يا متولي
و آدي الصراحة اللي تخلي
عرق الغضب
فينا تمللي
بالجهل نافر
و التضليل
الله الله يا بدوي
لم الشخاليل
1968
-
شيد قصورك
شيد قصورك ع المزارع
من كدنا وعمل إدينا
والخمارات جنب المصانع
والسجن مطرح الجنينه
واطلق كلابك
في الشوارع
واقفل زنازينك
علينا
وقل نومنا في المضاجع
ادي احنا
نمنا ما اشتهينا
واتقل علينا بالمواجع
احنا اتوجعنا
واكتفينا
وعرفنا
مين سبب جراحنا
وعرفنا روحنا
والتقينا
عمال وفلاحين
وطلبه
دقت ساعتنا
وابتداينا
نسلك طريق
ما لهش طريق
ما لهش راجع
والنصر قرب من عنينا
النصر أقرب
من إدينا
صبر أيوب
فين آخر الصبر ياشيخ أيوب
و لأمتى الحر يبات مغلوب
الجو ضباب
الوقت غروب
الديب ع الباب
الباب موروب
الحرب الحرب الحرب
و لا غير الحرب سبيل
و الضرب الضرب الضرب
على ناصية كل ذيل
النار و العار
لعدو الدار
و الموت للخاينين و الغدار
كان جدي كبير السن وكان
بيقوللي كلام
زي القرآن
الحق عجوز و قديم و يغر
لكن ما مايموتش و له طلاب
و التار قنطار
فوق كتف الحر
و الصبر ف وقت البلوة عذاب
و العزم صديق ف الوقت المر
و لا غير العزم
تلاقي صحاب
و الأرض براح
و ان داسها الذل
تضيق بالناس
و الخضرة تموت
و يعربد فيها البوم أجناس
و لا تبقى حياة
و لا يبقى نظام
و لا خطوة تسير بالناس
قدام
و لا تعرف بكرة
حيجي بأيه
و لا تفهم معنى لأي كلام
و نلف نلف
و برضه نقول
الحرب سجال
داير على طول
و السكة أمل
و النية عمل
و الجهد حياة
و الراحة شلل
يا زنود الناس الشغالة
ملعونة الراحة
ف خط النار
النصر عروسة يارجالة
لكن ممهورة
بالاصرار
التار يا عروبتنا
التار
التار فوق رقبتنا
قنطار
و خلاص الشعب الحر اختار
الحرب
الحرب
الحرب
و ليحيا كفاح الشعب
1968
ع المحطة
ع المحطة
ع المحطة
و اللي شفته ع المحطة
طلعت الخفة
أم شنطة
سلم الأتوبيس بنطة
حتة ملعب
و الأكادة
ف القوام و الحسن بطة
هي خشت درجة أولى
و الكراسي بقت منطة
سابو تانية و غلب تانية
و القطيع على أولى خطي
اللي يصبش ف الجونلة
واللي يعلى
و اللي يوطى
بص واحد م اللي هما
دمعم فلفل و شطة
شاف صنايعي
ف البريمو
قال له خش هناك
يا أوسطى
تانية
انسب للي زيك
دي الحقيقة
بلاش مغالطة
لسطى قال له
يا عم زوق
دي الحياة تحب المباسطة
و انت شايف
مش مغمض
حاجة ملبن
حاجة قشطة
و لا يعني الكون حيخرب
لو فقير
يلهط له لهطة
على رأي المثل
ان قلت كلمه لم تخاف
وان خفت كلمه
لم تقول
كلام تقيل
على الخفاف
والفهم لصحاب العقول
مافهمتنيش
شد اللحاف
ونام وسيب النوم يطول
وبوس وسيب النوم يطول
وبوس اديك
وكلها حاف
والصبر برسيم العجول
تاكل شمال
تشيل كتاف
يعرض قفاك
واصبر
تنول
ولما تفرج
بالكفاف
تهيص
وتملا المخله
فول
غنوة لفلسطين
يا فلسطينية
و البندقاني رماكو
بالصهيونية
تقتل حمامكو ف حماكو
يا فلسطينية
و أنا بدي اسافر حداكو
ناري ف ادية
و ادية تنزل معاكو
على راس الحية
و تموت شريعة هولاكو
يا فلسطينية و الغربة طالت
كفاية
و الصحرا أنت م الاجئين
و الضحايا
و الأرض حنت
للفلاحين و السقاية
و الثورة غاية
و النصر أول خطاكو
يا فلسطينية
و الثورة هي الأكيدة
بالبندقية
نفرض حياتنا الجديدة
و السكة
مهما طالت
و باتت بعيدة
مد الخطاوي
هو اللي يسعف معاكو
يا فلسطينية
فتنام عليكو البشارة
بالنصرة طالعة
من تحت ميت ألف غارة
والشمعة والعة
و الأمريكان بالخسارة
راجعين حيارى
عقبال حداكو
1969
غنوة للسلام
قد ايه القلب يعشق
لو سمع غنوة سلام
يا سلام
قد ايه الغنوة تحلا
لو بدينا بالسلام
يا سلام
قد ايه الروح تميل
و النغم يطلع جميل
و الوتر يوصل كلامه
للقلوب صافي و أصيل
قد ايه
و قد ايه
بس اقول ايه
و لا ايه
السلام دا كلمة خضرة
زي أوراق الريحان
ترتوي منها الشفايف
لما ينطقها اللسان
زوقوك الناس يا دنيا
بالكلام
عن السلام
و الكلام
غير الحقيقة
و العمل
غير الكلام
يا سلام
من هنا نبدى الكلام
يا صبابة يا مغرمين
كلنا نحب السلام
و السلام يحب مين ؟
السلام
بيحب نوره
و شوفوا نوره تبقى مين
فاليري جيسكار ديستان
والست بتاعه كمان
حيجيب الديب من ديله
ويشبع كل جعان
يا سلاملم يا جدعان
ع الناس الجنتلمان
داحنا حنتمنجه واصل
وحتبقى العيشه جنان
التليفزيون حيلون
والجمعيات تتكون
والعربيات حتمون
بدل البنزين
بارفان
وحتحصل نهضه عظيمه
وحتبقى علينا القيمه
في المرسح او في السينما
او ف جنينة الحيوان
وحتبقى الاشيا زلابيه
ولاحوجه لسوريا وليبيا
وحنعمل وحده أرابيا
مع لندن والفاتيكان
والفقرا حياكلوا بطاطا
وحيمشوا بكل ألاطه
وبدال مايسموا شلاطه
حيسموا عيالهم
جان
ودا بفضل صديكي
ديستان الرومانتيكي
ولا حدش فيكو شريكي
في المسكن
والسكان
-
في الليل
الليل ملاح
تايه
سواح
لا بيوصل شط
و لا بيرتاح
الليل مشحون
افكار و اشجون
و الم و نغم
و كاسات
و نايات
و آهات
و عبر
و حكم
و مشيت ف الليل خجلان مكسوف
مع ان الليل عريلن مكشوف
افراح الناس
و جراح الناس
على صدر الليل عناقيد مصفوف
و عيون الليل و الضلمة جبال
فاردين على وش السما غربال
الماظ ما يدور
في كاسات بنور
يرسم للنور ع الأرض خيال
و يشق اسكون الكون ارغول
و نغم فنان
ثاير مخبول
و عليل على فرشه بيتقلب
و يحايل جرحه المداري
و يقول
يا طبيب قلبك طيب
اسمعني حقولك اسراري
لو شلت الشكوى على لساني
و رميتها قريب
ما تكونش جراحي مآلماني
ابدا يا طبيب
منا دقت الجرح و خدت عليه
يسقيني المر
و برضه أسقيه من بحر الصبر
اللي ف قلبي
حتقوللي بتشكي أمال من ايه
و لا من أوجاع
و لا شوق ملتاع
دنا عمري ان ضاع
مش حبكي عليه
ابدا يا طبيب
يا طبيب دنا جرحي ملوعني
و ساقيني الحنضل من كاسي
و النار ف اضلوعي بتلسعني
و انا لسه صغار
و العيا قاسي
ولا عمر الليل مرة سمعني
عليت الآه على أنفاسي
ابدا يا طبيب
لكنيا طبيب أنا ببكي بصحيح
و با قول الآه زي المجاريح
و دموعي ف عني بتتكلم
و بتتألم
على قلب جريح
مسكين
كان أمله يحب سنين
و يلم الحب ف عشه اتنين
و اتهنى معاه
و ان قال الآه
انا أقول له يا روح القلب آهين
بس أنا لا بودي
و لا بيدي
دا قدر مقسوم
قدر لحبيبي يعيش بعدي
م الهنا محروم
اهم دا اللي وجعني
و خلاني
حطيت الشكوى على لساني
انما و حياة اللي قاسيته
و حياة الأمل اللي بنيته
و حياة القلب اللي جرحته
لا فرحت معاه
و لاهنيته
لو شلت الشكوى على لساني
و رميتها قريب
ما تكونش جراحي مآلماني
أبدا يا طبيب
و ينام الصوت
و الكون حواليه ساكن نعسان
و كأن الموت رمى تقله عليه
سكت العيان
الكاس له ناس
و الليل عجالات
و الحان مليان
و الناس مزاجات
و مجال الكاس اشكال أجناس
مليان حواديت
مليان روايات
و نزور بالليل دنيا الحمار
و نلاقي الكاس ع الناس
دوار
و يموت الليل على باب ألحان
ح يخش ازاي و الدنيا نهار
و قلوب و نفوس كده ع المكشوف
عريانة تمام
و تعالى نشوف
شوف دا اللي هناك
قدامه كاسين
مع انه لوحده
ما هوش اتنين
و كتير بيبصه
و مش فاهمين
و الكاس دا لمين
و الكاس دا لمين
اهو دا اللي بنظرة عين
شبكوه
و فاتو له الكاس مليان
و فاتوه
و حكايته طويلة و همه تقيل
وحقول لك ايه
و حعيد لك ايه
راح يملا عيونه بحلم جميل
بياع السهد ملا له عنيه
و ترن ف جو ألحان ألحان
نشوانة تخلي المولد هس
و غزالة بتتغزل ف حصان
و تقول له احبك انت و بس
و يفز هناك سيدنا المنطور
و يطب الكاس ف اديه مكسور
و تقول غشاشة بتلعب بيك
و يرد التاني عليه بفتور
طب و انت مزعل نفسك ليه
حشري
و سخيف
و ح قولك ايه
و مانو لي يقول
» موس أندك خق «
و السامر يضحك لما يطق
و يحط الحشري عنيه ف الأرض
و يقوم و يقوم يطوح مرة يمين
و يميل زي البخت اشمال
و ف جو الليل يفرق مسكين
لا يغير حال
و لا يشغل بال
الحظ حمار من غيرحمار
فقد التمييز
زي الخفافيش
هجرو البساتين
سكنو الدهاليز
و الحظ بطبع غباوته عنيد
و دماغه حديد
لو يعند حتى على الغزلان
ينسخطو معيز
و نسيب دهليز
و نخش ف باب
و نعد باب ندخل سرداب
و نلاقي ضحايا الليل واقفين
و الحظ بيلعب بالأعصاب
طبليه عليها نمر بنظام
من واحد لما يمكن الألف
و الدنيا زي ما هي تمام
على هيئة كورة
تدور وتلف
و شنب مفتول
يصرخ و يقول
اللقمة بتنده اكالها
و الرزق نصيب
و الدنيا الدايرة ف احوالها
زي المجاذيب
الصبح معاك
و الظهر عليك
و الحظ لو ادي
ما بينقيش
جربها و يمكن لو تديك
من جودك برضه ما تحرمنيش
قرب قرب
جرب جرب
و دي لعبة حظ مفيش تبكيش
و الكورة تدور زي البندور
تحرق على ناس و تجامل ناس
و الشيخ سلمون عبد المقدور
وواقف على اعصابه و محتاس
يلعب ع الستة
الخمسة تصيب
ينقل ع الخمسة
الخمسة تخيب
و خلاص الحظ
اداله قفاه
و الحظ ان ولى
بيبقى عجيب
كلها ساعتين
و صريخ سلمون لعلع مقاملت
نهاود و سيكا و رست و صبا
و حجاز و بيات
يا فلوسي
يا خراب البيت يا نهار الشوم
طب المسكين من طوله و رفض
و الناس ملهية ف احوالها
بيدوسوا عليه
و بتاع الكورة مشغلها
حيبطل ليه
و اللقمة بتنده اكالها
طب و دا كله ايه ؟
الشارع نايم
تحت جناح الليل همدان
و عيون النور
سهرانة بتنعس ع العمدان
و الكون ملفوف
بعباية نسجها الليل بالخوف
و ف بحر الظلمة
رأيت على بعد شبح انسلن
حققت بعيني
لقيتها يمامة و كاسرة الطوق
كرابيج الليل
ناقشينها جراح
من تحت لفوق
و الأسى ف عنيها
مصحي الشكوى تقول حواديت
حواديت
ما لهاش علاقات بالشوق
و ليالي الشوق
مسيت و رميت ع الحلو سلام
قالت سلامين
انا قلت لوحدك ليه يا حمام
و وليفك فين
مالك بالليل وصال الرعب
خليك يا حمام عايش للحب
شالت بجناح
حطت بجناح
و رتني جراح تحت الجناحين
و قالت لي زمان الحب ما راح
و بقى لنا سنين ف الليل تايهين
خدمني الليل
و أداني الليل
و رميت له الغالي بسعر زهيد
و سقاني الشهد و دقت الويل
و كساني حرير و لبست حديد
و عرفت الناس م الراس للديل
و آمنت بأن الكل عبيد
و قالتها و طارت ف ثوابي
و انا شارد سرح و اتصور
و غمزني الفجر و صحاني
على الكون
حيكون بكرة منور
1969
-
قيدوا شمعة
قيدوا شمعة يا أحبة و نورولي
رمشتين من رمش عين
و بيندهولي
من هنا سكة ملامة
من هنا سكة ندامة
سكتين يا للا السلامة
أمشي فين يا ناس قولولي
قيدوا شمعة و نورولي
رمشتين من رمش جارح
فوق عيون السحر طارح
زادوا نبض القلب حبة
بالأماني بالمحبة
و الأماني هناك بشوكها
طالعة فوق الشط دوكها
بتلاغيني
و تناديني
من بعيد
و تقول آديني
كان بودي
عايز أعدي
و الظنون بتقولي هدي
من هنا سكة ملامة
من هنا سكة ندامة
سكتين ياللا السلامة
أمشي فين يا ناس قولولي
قيدوا شمعة و نورولي
قيدوا شمعة يا صبايا
نورولي و طمنوني
بحر بيني و بين هوايا
موجه يشبه موج ظنوني
كل موجة شايلة شيلة
حلم ليلة
و فكر ليلة
عد موج البحر يا اللي
شفت حالي و قولي لخلي
كان بودي عايز أعدي
و الظنون بتقوللي هدي
من هنا سكة ملامة
من هنا سكة ندامة
سكتين يا اللا السلامة
أمشي فين يا ناس قولولي
قيدوا شمعة
و نورولي
مال يا قلبي العشق بينا
مال
و خالي البال يلومنا
مال وقال للشوق يجينا
في الليالي يقل نومنا
بين مسانا
و بين صباحنا
نصحى و الناس نعسانين
موعودين بالحرح يا احنا
و الدوى للموعدين
ايه دا كل يا قلبي ايه دا
شوف طريق العقل و اهدا
من هنا سكة ملامة
من هنا سكة ندامة
سكتين يا للا السلامة
أمشي فين يا ناس قولولي
قيدو شمعة
و نورولي
سجن القناطرـ مايو 1971
كلام عن الكلام
كلام عن الكلام
مر الكلام
زي الحسام
يقطع مكان مايمر
اما المديح
سهل و مريح
يخدع لكين بيضر
والكلمة دين
من غيرادين
بس الوفا
ع الحر
كلمتين
كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
..........................
شابة يا أم الشعر ليلي
و الجبين شق النهار
و العيون بحرين أماني
و الخدود عسل و نار
و اللوالي ( اللؤلؤ) بابتسامتك
يحكوا أسرار المحار
يللي ساكنة القصر عالي
إيمتى يهنالي المزار
كلميني يا صبية
طال علي َّ الانتظار
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
.....................
قصرك المسحور غيلانو
أغبى من دود الغيطان
بعد مص الغصن الاخضر
ينحتوا عضم العيدان
و اللي خلى الارض خضرا
و اللي خلى الدار آمان
عاش بجور ملو جوفه
مات بخوفه من الغيلان
طوّع الغلبان
ما قالش عن شقا العمر اللي كان
كلمتين بمصر يبقوا
هما أخر كلمتين
حد ضامن يمشي آمن
أو مِـآمن يمشي فين
....................
أدي كلمة من عذابي قلتهالك
باقي كلمة
من حنيني صنتهالك
في الضلوع من دنيا ظلمة
كنت خايف يلمحوها
يقتلوها في سكة ظلمة
سقسقت و النور بشاير بشاير
زهرة الصبار يا سلمى
يا نسيم الشوق يا طاير يا طاير
خد لمصر في الصبح كلمة
طول ما يبقى الركب ساير
بالبصاير و العينين
يبقى ضامن يمشي آمن
يبقى عارف يمشي فين
محكمة
اسمع و شوف ماحصل
برض السمع واجب
قاضي المظالم وصل
و اتأكد الحاجب
عمل قوامك مرة
وهب كسكس ورا
وجه يقول محكمة
نطق و قال مجزرة
مع انه كان قبلها بدقيقة
عامل عون
نازل شتيمة وأذى
ف عساكر الكركون
و يغيب ويقرا الصحف
و يرد ع التلفون
ويمر من وسطنا
و كأنه نابليون
و فجأةفز اتنتر
واقف على حيله
كرشه العظيم انفتل
أنا باحسبه ديله
قول حبتين و اتنصب
باسم العدالة ميزان
مدموع بكلمة شرف
مش كلمة السلطان
ممكن يشيل الجبل
و ينخ من شعره
حسب الظروف و العلل و الرك ع الوزان
أول قضية شطح قال ع الضحية جاسوس
تاني قضية نطح سمى الرعية جاموس
تالت قصية انكشف واحد عليها فلوس
رابع قضية حكم بالحبس ع المحبوس
خامس قضية و أنا ف الأصل راجلها
سألني ايه تهمتك ؟
أنا قلت أجلها
لما الميزان يتوزن
و يلاقي وزانه
و من الصباح للمسا
ربك يعدلها
1970
مناعة أزرق
مناعة أزرق
جلابة أرزاء
يا سخامة
يا لطامة
يا للي اسمك أخلاق
ازيك
ايش حالك
ايه آخر الأنباء
جزروكي ؟
دبحوكي ؟
خلوكي أشلاء
منا قايل و سمعتي
بس انتي اللي طمعتي
ف بلدنا يعزوكي
بدماغ الدقماق
بالقضية الفنية
صرعوكي السجانة
حبسوكي ف قضية
مرفوضة و خسرانة
و التهمة الجنائية
قال انك انسانة
و خدوك الشرطية
و بتوع الهجانة
و أبو عسكر حرامية
بيبرطع ف تكية
و يقول اشتراكية
و الناس لسه جعانة
و أبو لكنة فرنساوي
طبال و مغناوي
بيغني اشتركاوي
و العالم طرشانة
يا هبيلة يا فضيلة
يا بتاعة المهابيل
بلا وكسة بلا نيلة
بلا هفة مخاليل
دي بلدنا و لا حولا
ما بقاش فيها علاولة
و عوضنا ع المولى
ف ولادنا الشماليل
بادينا و رجلينا
أسسنا و علينا
و عملنا اللي علينا
جيل يطلع ورا جيل
وأخيرا ولا آخر
أخلاقنا بتتأخر
و مهازل و مساخر
وهزيلة و تضليل
و البامية السلطاني
و القزع الأخراني
من واحد للتاني
لا تحزن ياخليل
1967
نيكسون
شرفت يا نيكسون بابا يابتاع الوو ترجت
عملولك قيمة وسيما سلاطين الفول والزيت
فرشولك أوسع سكة من راس التين على مكة
وهناك تنفذ على عكا ويقولوا عليك حجيت
"ؤاهو مولد ساير داير شيلاه يا صحاب الييت"
جواسيسك يوم تشريفك عملولك دقة وزار
تتقصع فيه العايق’ والساكت والمنشار
والشيخ شمهورش راكب ع الشعب وهات يامواكب
وبواقي الزفة عناكب ساحبين من تحت الحيط
" واهو مولد ساير داير شيلاه يا صحاب البيت"
خد مني كلام يبقى لك ولو انك مش ح تعيش
لاح اقول اهلا ولا سهلا ولاتيجي ولا ماتجيش
بيقولوا اللحم المصري مطرح مابيسري بيهري
وده من تأثيرالكشري والفول والسوسي ابو زيت
" واهو مولد ساير داير شيلاه يا صحاب البيت"
نيكسون جاء
نيكسون جاء
ا ب ت ث جح
الف باء
جونسون روح
نيكسون جاء
قولوا هأوأو
أو قولو هاء
على صحافتنا الغير غراء
ذات صباح
يا فتاح
بالجرانين على ريق النوم
جم على سهوة كبسوا القهوة
و ابتدأو ف تضييع اليوم
اللي يقول النصر نميس
ينفع طاكسي
و يمشي رميس
و اللي يقول الفورد يا بيه
أجعص من أجعصها جعيص
واللي يقول جنسن دا احمار
راجل عقله
عقل صغار
من غير حيث
ينصب ألف جنازة بطار
بس أهو راح
و حنرتاح
و حنتبجح بقى و نقول
يخرب بيته
و يدلق زيته
و يعيش نيكسون لنا على طول
نيكسون عال
مش بطال
و اللي يقول غير كدة مقفول
شفت كلامه
الا كلامه
آدي كلام راجل مسؤول
و لاعنيه
يا ختي عليه
فيهم سكس
ما هوش معقول
و اللي يقول يا بقر
يا سراكسة
نيكسون ماله
و مال النكسة
و اللي يقول بلوتنا كبيرة
و اللي يقول مين المسؤول
و اللي يقول........
و اللي يقول........
شوفو بقى يعني
ما تقلقونيش
آدي صحافتنا و غيرها
مفيش
مش عجباكو ؟
ما تلومونيش
قولو هأوأو
أو قولو هاء
على صحافتنا غير الغراء
ابتثجحن
الفن باء
1969
هلا بالحب
هلا بالحب يا لمه هلا به
يصبي القلب
ويخليه صبابه
يدوس ع الشوك
ويوصل للآماني
ونرجع للهوي بعد المتاهه
هلا بالحب يا لمه سفاين
عليها الحنه من خضر الجناين
تجوب البحر وتطوف ع المواين
تلم الشمل
ويزيدوا الصحابه
هلا بالحب يا لمه حمامه
تشيل الشوق
على جناح السلامه
وترسم للهوي
مليون علامه
فى ضي النجمه
وف طي السحابه
هلا بالحب يالمه سواقي
تصب الغنوه
تسرح فى المساقي
أدوق واسقي حبيبي
واللى باقي
يكفى اللمه
ويفيض ع الصحابه
هلا يالحب يا لمه يحبينا
يزود حينا
أنور وزينه
هلا بالحب يجرحنا يداوينا
ونرجع للهوي
بعد المتابه
القاهرة / 1969
-
ورقة من ملف القضية
إنت شيوعي
أنا مصراوي
إنتو مصايب إنتو بلاوي
ممكن أعرف مين الأول بيكلمني
إحنا نيابة أمن الدولة
دول مين
دولة مصر
مصر العشه ولا القصر
أيوه حنبدي ندور ونلف حاجه تنرفز خالص
إف
مالك ... شايل طاجن خالك
لم لسانك ما تخرفش
أنا ما اقصدش اهانتك طبعا
أيوه استعبط
لاما اعرفش
إيه رأيك في سفارة كوريا
إيه رأيك في قضية مصر
مصر ف وحده
هى وسوريا وليبيا ولازم ييجي النصر
ييجي منين وازاى ولمين
آدى كلام الشيوعيين
أنا من حقي
حق ف عينك
أنا بتكلم بيني وبينك
يعني كلام بره التحقيق
إذا كانش يسبب لك ضيق
طيب قول
مين مسئول ؟
مين مسئول عن إيه يا إخينا
ع إللي جرى لنا ف غزه وسينا
أنت شيوعي أكيد وطاوعني
فض دمغك من دي قضيه شعبنا جاهل
مهما تقول له
مش حيآمن بالشيوعية
ما الشيوعية فى فيتنام
إيه رأيك فيهم يا همام
مش بطال مش بطال
لكن إحنا .. ورانا عيال
طب ما نحارب لجل عيالنا
يطلعوا أسعد من أجيالنا
إنت الظاهر مخك فاضي
وحتتعبني معاك ع الفاضي
وأنا بحبحت معاك بكفايه
إبقي اتفلسف عند القاضي
هى قضيه ؟
لأ ملوخية
أمال فاهم إيه آمال هى الدولة دى لعب عيال
ممكن أعرف أنا هنا ليه
أيوة حتعرف
أمال إيه
يوم خمسه وعشرين الماضي
إيه مشاك عند التحرير
تحرير إيه يا جناب القاضي
أنا مش فاضي
بكره تصير
بطل غلبه وجاوب دوغري
أنا غلباوي كده من صغري
كل الشيوعيين أمثالك
آخر غلبه وقله ذوق يحصل إيه لو تمشي ف حالك
فاكر نفسك مين
ما تفوق
لو راح افوق
مش من مصلحتك
أنا معجب جدا بصراحتك
إيه رأيك فى حكايه الطلبه
حاجه عظيمه بشرة خير
إنت دماغك ينفع جزمه
وانت لسانك ينفع سير
إخرس قطع لسانك سافل
كتر خيرك
مخك قافل
مين وداك بقي عند الطلبه رايح ضمن المندسين
رحت أناقشهم واسمع منهم
تسمع منهم إيه يا سي طين
دول عايزين الدنيا تولع علشان أصلا
مش فاهمين
هى الحرب يا عالم لعبه
دى بتتكلف بالملايين
وأنت حتدفع إيه من جيبك
امال ح ادفع من جيب مين
إنت حمار وخدوك فى مشمك رحت هناك زى الباقيين
عاملين لجنه
وقال وطنيه
مش ممكن دول وطنيين
وجماعة أنصار الثورة
وفلسطين وهباب الطين
ما نخلينا يا سيدي في حالنا
مالنا ومال الفدائين
هو إحنا اللي نهبنا بلدهم
دول عالم صيع فاقدين
قتلوا الراجل عند الشيراتون
وإحنا إللي طلعنا القاتلين
وصفي التل دا كلب وخاين
اهو كل العالم خاينين
واحد صاحبي مراته مرافقه
وهو مرافق
ييجي عشرين
أمريكا بتزعل وبتحرن
هو إحنا يا عالم ناقصين
مش نستعبر
م إللي جرالنا
ونعيش بقي زى العايشين
دي عيال عملا للشيوعيه
وإحنا عدو الشيوعيين
ورق دمك بس يا بيه
مين مساعدكو بقالكو سنين
بيساعدونا صحيح يا سي بعجر
علشان أصلا مش فاهمين
إحنا حيلتنا منين نديهم
ونسددهم بالملايين
يمكن يعني قضيه مبدا
مبدا مين وزكايب مين
هي دى عالم تعرف مبدا
دولا باقول لك
ناس مجانين
اخترعولنا السد العالي
علشان نبقي اشتراكيين
إشتراكيه هناك ف بلدهم
وإحنا ف دارنا
نعيش حرين
عايزين الفلاح الجاهل
يتساوى بالمحترامين
وكمان قال
تحديد ملكيه
أبو ألفين
يدوه خمسين
شغل ملاحده وعالم كفره
ومخالفين أحكام الدين
والعمال رخرين اسم الله
فاهمين روحهم
بني آدمين
ناس عايزين الحرق بولعه
دا كله من الشيوعيين
نشروا لنا الأفكار السوده
أولاد الكلب الملاعين
مين وداك بقي عند الطلبه
انطق قول
اتكلم مين
هما إيه مطالبهم ؟
انت حتستجوبني يا شاطر
لأمش قصدى
بس أنا باسأل
كانوا طالبين كراريس ومساطر
ولا مطالب ميه الميه
كل الشعب مآمن بيها
دول طالبين حرب وشعبيه
مين مجنون بقي
حيمشيها
عايزين يدوا الرتش سلاح
عشان تحصل فيها مجازر
أنا لو أشوف حلوف فلاح
شايل شومه
لازم اهاجر
لازم بينه وبينك دم
دم ف عينك
هس اتلم
ثم نحارب ليه
وبايه
بسلاح ما يموتش بعوضه
ورق دمك بس يا بيه
الحرب ضروره ومفروضه
واهو نفس سلاحنا المظلوم
في فيتنام دابح أمريكا
دى طبيعه أرض يا بني آدم
بطلوا بقي كدب وبولوتيكا
طب ما الهند بنفس سلاحنا
فى باكستان
بعزقت الغرب
رأيك يعني ضروري ان إحنا
وحتما يعني نخش الحرب
طيب
حاضر
فين المخبر
حتغير رأيك
بالضرب
-
كلمتين
كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
..........................
شابة يا أم الشعر ليلي
و الجبين شق النهار
و العيون بحرين أماني
و الخدود عسل و نار
و اللوالي ( اللؤلؤ) بابتسامتك
يحكوا أسرار المحار
يللي ساكنة القصر عالي
إيمتى يهنالي المزار
كلميني يا صبية
طال علي َّ الانتظار
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
.....................
قصرك المسحور غيلانو
أغبى من دود الغيطان
بعد مص الغصن الاخضر
ينحتوا عضم العيدان
و اللي خلى الارض خضرا
و اللي خلى الدار آمان
عاش بجور ملو جوفه
مات بخوفه من الغيلان
طوّع الغلبان
ما قالش عن شقا العمر اللي كان
كلمتين بمصر يبقوا
هما أخر كلمتين
حد ضامن يمشي آمن
أو مِـآمن يمشي فين
....................
أدي كلمة من عذابي قلتهالك
باقي كلمة
من حنيني صنتهالك
في الضلوع من دنيا ظلمة
كنت خايف يلمحوها
يقتلوها في سكة ظلمة
سقسقت و النور بشاير بشاير
زهرة الصبار يا سلمى
يا نسيم الشوق يا طاير يا طاير
خد لمصر في الصبح كلمة
طول ما يبقى الركب ساير
بالبصاير و العينين
يبقى ضامن يمشي آمن
يبقى عارف يمشي فين
وعد الحر
الحظ دا خطي
و الكلمة دي ليا
غطي الورق غطي
بالدمع يا عنيه
شط الزتون دا شطي
و الأرض عربية
نسايمها أنفاسي
و ترابها من ناسي
و ان كنت انا ناسي
ما حتنسانيش هي
الحظ دا خطي
و الكلمة دي ليا
لكتب على عني
يحرم عليكي النوم
و احبس ضياعيني
بدموعي كل اليوم
قبل الوفا بديني
زي الصلا و الصوم
و الدين ف عرف الحر
هم و مذنة و مر
و هموم تجيب و تجر
أحزان مخبية
الحظ دا خطي
و الكلمة دي ليا
لأكتب على كفي
و الحبر من دمي
يا همتي كفي
يا عزوتي ضمي
أول ما حنوفي
بالوعد حنسمي
باسم اللي مايو صغار
ف المدرسة و الدار
و المصنع اللي انهار
فوق الصنايعية
الحظ دا خطي
و الكلمة دي ليا
1971
يا عرب
يا عرب .. يا عرب .. اسمعوا صوت شعب مصر
أحفظوا لمصر المكان .. و احنا عالعهد اللي كان
مصر أوفى من الزمان ..
و انتو عارفين شعب مصر
يا عرب يا عرب يا أهل مصر
اللي خانوا العهد بينا .. و استباحوا كل حاجة
و استهانوا بالعروبة .. و استكانوا للخواجة
مستحيل حيكونوا منا .. نحنا حاجة و هما حاجة
هما باعوا الجلابية .. و الوطن و البندقية
و ا حنا أصحاب القضية ..
احنا ما بنبيعش مصر
يا عرب يا عرب يا أهل مصر
يطلع الدجال بزيفو .. يملا وادي النيل ضباب
ينزل الجلاد بسيفو ... يزرع الموت و الخراب
يطول الليل زي كيفو .... الصباح له ألف باب
و احنا بوصلتنا بإيدينا .. ما تخافوش من الليل علينا
مهما غبتو عن عينينا ..
انتو جوا بقلب مصر
يا عرب يا عرب يا أهل مصر
سينا و لا .. يافا و لا .. حيفا ولا ... دير ياسين
اسألوا الشمس اللي هالة .. عللي صحيوا مبدرين
يزرعوها نور و غلة .. دول جدودنا و لا مين ؟
حقنا و حتما ً يُعاد .. بس لو بانت سعاد
و البيان ده لوه معاد ...
و المعاد حيكون في مصر
يا عرب يا عرب يا أهل مصر
يعيش أهل بلــــــــــــــــــــدي
يعيش أهل بلــــــــــــــــــــدي
و بينهم مافيــــــــــــــــــــــش
تعارف يخلي التحالف يعيــش
تعيش كل طايفـــــــــــــــــــة
من الثانية خايفــــــــــــــــــــة
و تنزل ستاير بداير و شيـــش
لكن ف الموالــــــــــــــــــــــد
ياشعبي يا خالـــــــــــــــــــــد
بنتلم صحبـــــــــــــــــــــــــة
و نهتف يعيــــــــــــــــــــــش
يعيش أهل بلــــــــــــــــــــدي
يعيش المثقف على مقهى ريش
يعيش يعيــــــــــــــــــــــــــش
محفلط مزفلط كثير الكـــــلام
عديم الممارســــــــــــــــــــة
عدو الزحـــــــــــــــــــــــــام
بكام كلمة فاضيـــــــــــــــــة
و كام اصطـــــــــــــــــلاح
يفبرك حلول المشاكل قـــوام
يعيش المثقف يعيش يعيش يعيش
يعيش التنابلة ف حي الزمالك
و حي الزمالـــــــــــــــــــــــك
مسالك مسالــــــــــــــــــــــــك
تحاول تفكــــــــــــــــــــــــــر
تهوب هنالــــــــــــــــــــــــــك
تودر حياتــــــــــــــــــــــــــك
بلاش المهالـــــــــــــــــــــــك
لذلك إذا عزت توصف حياتهم
تقول الحياة عندنا مش كذلك
مش ممكن تشوفهـــــــــــــــم
ف وسط المدينــــــــــــــــــة
اذا مر جنبك اوتومبيل سفينة
قفاهم عجينــــــــــــــــــــــــة
كروشهم سمينـــــــــــــــــــــة
جلودهم بتضــــــــــــــــــوي
دماغهم تخينــــــــــــــــــــــة
سنانهم مبــــــــــــــــــــــــارد
تفوت ف الجليــــــــــــــــــــد
مفيش سخن بـــــــــــــــــــارد
بياكلوا الحديـــــــــــــــــــــــد
مدام نهر وارد
و جي م الصعيد
تزيد الموارد
كروشهم تزيد
و تسمع و تسلم
بان التنابلة أو الأكالين
حيسمح كبيرهم
و يعمل مقابلة مع الفلاحين
و يحصل تحالف مابين الجميع
و نملا المصارف
بدم القطيع
أطيع الخليفة
أطيع والديك
أطيع التنابلة
دا مفروض عليك
و تزرع و تبعت لحي الزمالك
و حي الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك اذا حد جاب لك سيرتهم
تبسمل تكبر
و تهتف كذلك
يعيش التنابلة
يعش يعيش يعش
يعيش أهل بلدي
يعيش الغلابة في طي النجوع
نهارهم سحابة
و ليلهم دموع
سواعد هزيلة
لكن فيها حيلة
تبدر تخدر جفاف الربوع
مكن شغل كايرو
ما يتبعش دايروه
لا ياكل و لا حتى يقدر يجوع
يا غلبان بلدنا
يا فلاح يا صاتع
يا شحم السواقي يا فحم المصانع
يا منتج يامبهج يا آخر حلاوة
يا هادي يا راخي ياعاقل ياقانع
ما تتعبش نفسك
ف شغل السياسة
و شوف انتشغلك
بهمة و حماسة
و عود عيالك فضيلة الرضا
لأن احنا طبعا عبيد القضا
و رزقك ورزقي و رزق الكلاب
دا موضوع مؤجل ليوم الحساب
كمان الصحافة حتكتب ف حالتك
و تنشر مناظر لخالك و خالتك
و تطلع يا مسعد عليك الغناوي
و تسمع باسمك ف قلب القهاوي
تحبك مشيرة و بنات الجزيرة
و قصة غرامك تشيع ف الرداوي
يعيش عم مسعد
يعيش يعيش يعيش
يعيش أهل بلدي
1968
