ياعم كبرها ..
شايلها فوق راسك
وبعدت عن ناسك
ايه يعني لما اتعطلت
والحاله منك قفلت
سلمها للي خلق
وياعم كبرها ...
الناس مابقتش ناس
وسيدها بقى كناس
وآآآآه يادنيا وطيبك ينداس
واللي ماعنده دم قالوا عليه حساس !!
وياعم كبرها ...
قالوا الحبيب بيسُر
يمسح بإيده المُر
ايه يعني لما عليك اترسم واتغر
ولما تسأل يجاوب أصلك ماتلزمنيش!!
ياعم كبرها ...
من القلب تديهم
ولاشئ يساويهم
والجرح بإديهم
دا انت اللي ماتسواش
وبجد تستاهل أصل القلوب والمحبه تتباع بالساهل
ياعم كبرها ....
لما الكبير ينزل
والفرح بيعزل
لما الصغير قوي يركبها ويدلدل
وتقوله ياسيدي وجواك بيتزلزل
والحال ماهوش دايم
ياعم كبرها ...
لما الوطن يتهز
ويسوقه ابن العز
والفتوى للي تِهز
والشيخ على المنبر يفتي في اكل الـــ وِز
ياعم كبرها ...
شُهدا وعاهات وسيوف
صفوف تعدي ألوف
مش غزة ولابغداد
أصل الجهاد يامحترم أنواع
وجهادنا دا كله في طابور العيش
لكن ماأقولكش أصلك ماتعرفش
دا احلى منه مافيش !!
ياعم كبرها ...
مش لاقي حتى الفول
والصرف على المحمول
وابو العيال بيقول
الهم كاسرني
ياعم كبرها ...
القمح نستورده
والقطن صدرناه
والرز بيفكر يمكن هايجي قضاه
والأرض فيها الخير للغير مش لينا
ياعم ليه زعلان
كنا الحضارة ودلوقت سجادة الصلاه من الصين
ياعم داتطور
وياسيدي كبرها ...
عايز تعيشها ملك
وللقلوب تمتلك
كبر دماغك وعيش حياتك وريح الجمجمه !!
خليك مع أهلك واعمل مايتقالك والجهل ينسبلك
واوعى تزعل اصل اللي حاسبها بالهم مات قبلك
اركن دماغك وخليك تابع لمصلحتك
وماليكش دعوه باللي رايح واللي جاي لو كان بقية اهلك
وانا مني أضمنلك انك تعيش مغمور
ومش بعيد من كتمتك يمكن تموت محسور
آخر طابور البشر مستني يجيك الدور
عايز نصيحه من حبيبه مخلصه
اقفل مشاعرك وتربس الأقفال
مين اشتراك تشتريه بالدهب
واللي يبيعك لازم تبيع في الحال
واللي يقدر دخلته قلبك قله احلى كلام يتقال
واللي يبيعك بعد المحبه شحته
مايسوى عندك في سوق المحبين مال
لافي يوم تكتم صرختك
ولايوم يصادروا فكرتك
ولاحد يحسب خطوتك
ولاقلب ينسى حياه
ولاتتكسف من دمعه ولامن ااااه
ولايركع في يوم قلبك ولاجبهتك
الا لمين حسن بين البشر خلقتك
وبلاش تكبرها وقول ياربي آدي حكمتك
ولما تأسى عليك ماتزعلش
ووافتكر انها دنيا
وساعتها كبرها ...