لما تلاقى ولد بيعاكس بنت وتعاتبه ولو برفق هتلاقيه قالك بدون تفكير .. وأنأ أعملها ايه ما هى اللى ماشية عريانة .. أنا معاه أن مشيها عريانة بيشجع عالمعاكسة والبصبصة وأن كان العرى الآن لم يصبح سببا للمعاكسة بدليل أن المحجبة والمنتقبة لم يسلموا من الأذى .. انما فى نفس الوقت القاء اللوم على العارية مع تبرير الفعل المشين شىء خاطىء جدا . بدليل أن الشاب نفسه لو سافر الى أى دولة أوروبية وما أدراك ما أوروبا ونساء أوروبا مش هيقدر يفتح عينه فى كعب رجل واحدة ( الا اذا كانت عايزة كدة ) .. اذن العرى مش مبرر للمعاكسة .. ولو فكرنا لحظة واحدة هنلاقى أن القانون وأن كان موجود الا أنه تطبيقه غائب ولو بنت فكرت تروح قسم شرطة علشان تعمل محضر تحرش يا ويلها ويا سواد ليلها مش بعيد يتم التحرش بيها فى القسم أو عالأقل السخرية منها ،
حتى فى جرائم الاغتصاب دايما نظرة المجتمع بتكون مسيئة للبنت حتى لو مجنى عليها وبيلازمها العار مدى الحياة ونظرات الناس باحتقار ودونية لها بتعيد قتلها مئات المرات بدلا من انصافها !! .. ياللى بتعاكس لوم نفسك لحظة .. أين غض البصر ؟ أين الأخلاق الدينية والمجتمعية والعادات والتقاليد ؟ لو بتأخد العرى مبرر ياريت ما تبقاش انت كمان عينك مكشوفة .. ما سبق ليس دفاعا عن العرى وانما اتهاما لمد البصر .. و يا قالعين يكفيكوا شر بص العين
مواقع النشر (المفضلة)