صباحك يا مصر زى وشك جميل وحزين ياللى وجعت القلب على حسك سنين و سنين عاشقة يا مصر ترابك الحنه نفسى يا مصر تعوديلى زى زمان كما الجنة فاكرة يا مصر "صباحك الوردى اجمل صباح عندى"؟ اسمعها قبل ماروح الصبح مدرستى قلبى يغنى يا مصر يا بنتى وعروستى فاكرة يا مصر "المريلة الكحلى"؟ وشاب اسمر عيونه من بعيد لبعيد مكسوفة تلمَح لى يشغل الاغنية حلاوتها تصرَح لى الرقة دايبة فى الخجل والذوق امشى بثبات مطمنه ورافعة راسى لفوق فاكرة يا مصر رغيفك البلدى كما وجه بنت صبوح وبرىء بقلب رقيق ومتندى امشى فشوارعك متزوقه نضيفة الناس على بساطتها عمال فتراحيلها فلاح ومحني لها وصنايعية حَرِيفَة دكتور مهندس صيت عابر بلاد وبلاد وبنات بخيرهم فأى بلاد تصون اعراض اسمع "يا احلى البلاد يابلادى" اغنى واغنى ارقص وانط وقلبى سعيد لبكره الحلو مستنى احضن دروسى وعيلتى وجيرانى مايهمنيش ان كان ده مسلم ولا نصرانى انا اصلى من شبرا واهلى من المنصورة والعزة وخدانى آآهين يا مصر عاللى باحسه دلوقتى دانا بابكى لو غنوا نفس الغنوة من ضيقتى باشوف عيونى مش عيونى ولا هى دى مرايتى ولا هى دى مصرنا ولا هى دى نهايتى ابكى تهزنى ايد الصغير
امسح على شعره اشوفه عودة لحكايتى مسكين ماهوش دارى باللى مستنيه ياما كان فنفسى ارشقه فى الارض زرع ارويه الارض بارت والولاد زى العيدان الخُضْرْ عاشقة يامصر لترابك بس شايفة الغدر خايفة على عيون الولاد من العسس ومن الضلام والقُدْرْ خايفة ولسه بحلم ييجى على ولادى هوا بلادى ويملا الصِدْرْ وتطبطب عليهم ارضنا وسمانا والقمره ويغنيلهم منير "فى عشق البنات" و"المريلة الكحلى" و"الليله يا سمره"
1حبيبتى مصر
رد مع اقتباس
مواقع النشر (المفضلة)