فى ميدان التحرير
ــــــــــــــــ
فى قلب الميدان وقدام الناس
ضربوا اخويا من غير إحساس
ضربوه ضرب الأعداء
مع أنه قدم روحه فداء
نسيوا أنه أبن الأرض
اللى عليها العدو أنقض
جاى يقول كلمته
ويدور على شلته
بيقول نفسى فى عيشة هنية
ده أنا ابن البلد ديه
من حقى أقول وأتكلم
من حقى أكل وأتعلم
أوعوا تسكتونى ببندقية
أنا اتولدت على الأرض ديه
مش هسكت تانى ولا هخاف
ومطلوب منكم الأعتراف
بأبسط حقوقى فى بيتى
بزرعى وتعبى فى غيطى
أنا مش أبن ضال
ولا أتمنيت المحال
بس أعيش بكرامة
أعيش وأهلى بسلامة
نفسى أحس بوطنيتى
مش فى أرضى بغربتى
هرفع صوتى وأقول كفاية
هنا لازم تخلص الحكاية
الكبير كبير بحكمته
مش بسلاحه وبندقيته
الكبير هو الأمان والحنان
مش اللى يقتل فيا الإنسان
هفضل مرابط فى أرض الميدان
لحد ما أخد حقى بالفدان
وأهش كل الوطاويط
اللى علينا بيوتنا بتحيط
فى قلب الميدان هنا مستنى
لحد ما حقق كل التمنى
مواقع النشر (المفضلة)