ميّل على مخدتي وقالي يابنتي
الصبح نوره ظهر يادنيتي انتي
فتحت عيني وقمت بالعافية
صحيت أخويا وأمي وفرشتي دافيه
وصوت مكاين ري شغاله من بدري
والشمس تفرش ضي وتقولي يالا اجري
وأقوم بهمه وحب أغسل أنا وشي
ينده أبويا فين الفطار يادار
أدخل على الخير كله عندنا في كرار
لبن وقشطه وزبادي وكل شئ موجود
وسمنه بلدي والعسل والخير مالوهش حدود
واطلع بسرعه على سطوح بيتنا
اجيبلي كام بيضه تفتح شهيتنا
وينده أبويا بعزمه تتلم جمعتنا
وادخل أنا بالصنيه محمله بالخير
وأمي جايه من بعيد شايله في ايدها فطير
أقعد وأكل واخويا على حجري
أقطع وأديله يشبع يقوم يجري
ماهو الصغير لازم يتعمله حساب
وكل كلمة وخطوه مننا لازم تكون بحساب
وبعد دي الأكله يطلب أبويا الشاي
يشرب ويسرح على حاله وأشغاله
ينده عليا يقول تعالى ويايا
انتي ياوش الخير نرجع بغدوايا
ننزل على أرضنا ولسه الندى موجود
والزرع والطير والشجر يسبح المعبود
وفي أول الأرض كان فيه عندنا توته
يعملي قرطاس ويملاه وأبقى مبسوطه
ولما يقرب شغلنا يخلص
ينده أبويا يقولي ياخضره
املي السبت واقطفي للبيت من الخضره
وانزل قصاده في أرض الرز واستنى
لما نصيد السمك واكثر مافيه قرموط
أمسك قصاده وأضحك بعلو الصوت
أصل السمك طازه والقلب خالي والعشا مضمون
وادخل على أمي بالخضره والمقسوم
تشوي بسرعة السمك وتحضر المعلوم
ناكل ونضحك ونتسامر ولاحد على بالنا
راضيين بقسمة ربنا يصلح لنا حالنا
وعلى سطوح بيتنا تحلو سهرتنا ونفرش عليه القش
نشوي الدره ونقعد كلنا وكأنه لينا عرش
والضي مش كهربا أصل القمر جارنا
حوالينا نسايم ربيع تهدي أعصابنا
يقعد أبونا مادد لنا رجليه ويقول لنا أنا قطر
نجري عليه كلنا نركب ويسوق بينا وكله محبه وصبر
وامي تضحك وتقوله ياسيدي
مالي في قطرك مكان يادنيتي وعيدي
يضحك بعلو الصوت ويقول ياتاج راسي
انتي مكانك في قلبي وحبك على راسي
ويلمنا كلنا عشان معاد النوم
ونبات في حضنه كلنا ومن تاني يبدأ يوم
كانت الحياه جنه والنفوس صافيه
والناس لبعضيها والقلوب دافيه
كانت الحياه حلوه وكنا بنراعي ونهادي
واللقمة متقسمه والأرزاق على الهادي
والعيشه كانت بسيطه والنفس مرتاحه
والصحه موجوده والقلوب واحه
ماكانتش تفرق مين اللي عنده الخير
كله في شرع الحب يتساوى ان كان غني أو فقير
وزي ماقلتي اااااااااه يازمان
انا بقولك لسه فيه انسان
الطيبه في قلبه وللزمان اللي كان عنوان
رد مع اقتباس
المشاركة الأصلية كتبت بواسطة م/ إيهاب عبد المؤمن
مواقع النشر (المفضلة)